Amed – Li dibistaneke navîn a navçeya Pîran a Amedê, xebatkarê paqijiyê Bekir Akbaba xwendekareke 13 salî, bi qasî du salan îstîsmar kiriye. Bavê zarokê diyar kir ku bersûc bi gotina “Li pişta min AKP heye” gefan li keça wî xwariye.
Li bakurê Kurdistanê û Tirkiyeyê tundî û îstîsmara li ser jin û zarokan her ku diçe zêde dibe. Li dibistaneke navîn a navçeya Pîrana Amedê, bûyereke îstîsmarê derket holê. Bekir Akbaba yê ku wekî xebatkarê paqijiyê li dibistanê dixebitî, xwendekareke 13 salî bi qasî du salan îstîsmar kiriye. Zaroka ku rastî îstîsmarê hatibû, di 25ê Nîsanê de rewş ji mamosteyê xwe re got û li ser vê yekê Bekir Akbaba di 26ê Nîsanê de hate binçavkirin û girtin. Malbata zarokê di 30yê Nîsanê de ji bo şopandina dozê serî li Baroya Amedê da.
Bi çek û tehdîtan îstîsmar kiriye
Bavê zarokê ji ajansa me re axivî û bal kişand ser polîtîkayên necezakirinê. Bavê zarokê diyar kir ku Bekir Akbaba keça wî bi zorê biriye qata bodrumê ya dibistanê û wiha got: “Wî kesî bi zorê keça min biriye jêrzemîna dibistanê û 2 salan îstîsmar kiriye. Bi gotinên ‘Li pişta min AKP heye, ez xwe dispêrim wan. Heke tu ji kesekî re bibêjî ez ê te û malbata te bikujim’ keça min tehdît kiriye. Keça min nexwest biçe dibistanê û piştî zexteke zêde rewş ji mamosteyê xwe re got. Mamoste dengê wê qeyd kir û qeyda deng radestî polîsan kir.”
‘Dewlet me Kurdan wekî dijmin dibîne’
Bavê zarokê bal kişand ser berpirsiyariya dewletê û kemasiyên di perwerdeyê de û wiha domand: “Heke dewletê cezayên giran bidaya, ev tişt nedibûn. Dewlet me Kurdan wekî dijmin dibîne, loma xwedî li me dernakeve. Kesên ku pişta xwe didin dewletê, van sûcan dikin. Ev kes di bin banê Midûriyeta Perwerdehiyê de dixebitî; dewlet çawa bê lêkolîn û tehqîqat kesên wiha digire ser kar? Zarokên me çawa bi ewlehî herin dibistanê?”
‘Bila cezayê herî giran bidinê’
Bavê zarokê diyar kir ku dîmenên dema keça wî yên ku ber bi jêrzemînê ve tê birin di kamerayên dibistanê de hene û wiha dawî li axaftina xwe anî: “Min ji Baroya Amedê jî daxwaza alîkariyê kir. Divê em hemû bibin yek da ku em pêşî li van bûyeran bigirin. Kesên van sûcan dikin ji deriyê pêş tên girtin ji deriyê paş tên berdan. Em naxwazin Bekir Akbaba deriyê paş were berdan. Bila cezayê herî giran bidinê da ku careke din kesek newêre vî tiştî bike. Îro mala min şewitî, bila ya kesekî din neşewite. Em ê têkoşîna xwe bidomînin.”
