* Fermandara Giştî ya YPJê Rohilat Efrîn derbarê geşedanên dawî yên li Sûriyeyê, pêvajoya entegrasyona hêzên leşkerî û nîqaşên li ser destûra nû de axivî û got: “Tu pergalên yek-rengî nabin çareserî. Ji bo Sûriyeyeke demokratîk û bi îstîqrar, divê hebûna jinan û mafên wê di destûra nû de bi awayekî fermî werin garantîkirin. YPJ ne tenê hêzeke çekdar e, çanda xweparastinê ya civakê ye.”
* Parlamenterê CHPê Sezgîn Tanrikulu anî ziman ku xwefesixkirina rêxistinê û danîna çekan tespît û piştrast e û wiha got: “Divê demildest bêyî ku bê dirêjkirin desthilat berpirsyariya xwe ya ji bo çerçove qanûnan pêk bîne.”
* Rêveberên ZIMAN-DERê yên Colemêrgê bi boneya 15ê Gulanê Cejna Zimanê Kurdî banga xwedîderketina ziman li gel kirin û diyar kirin ew ê di 15ê Gulanê de bi meşeke girseyî pêk bînin.
* Li herêma Serhedê bi hatina biharê re berhevkirina pincarê dest pê kir. Welatiyên ku pincarê berhev dikin û difiroşin anîn ziman ku derman bi cureyên pincarê tên çekirin, lê qîmeta pincarê nayê zanîn.
* Endama Sekreteryaya Platforma Yekîtiya Jinên Kurd a Bakur Sevîm Bîçîcî bal kişand ser rola jinan a di avakirina yekîtiya neteweyî de û destnîşan kir ku dê yekîtiya neteweyî ya jinan teqez pêk bînin.
* Endama Komîteya Amadekar a 11emîn Festîvala Şanoyê ya Navneteweyî ya Amedê Elvan Koçer da zanîn ku bi festîvalê xwestin ji pêvajoya heyî re bibin bersiv û wiha got: “Ji bo vê yekê ‘Diyalog ji bo aştiyê’ bû navê festîvalê. Bi vê armancê me dît ku ne tenê pêdiviya me, pêdiviya hemû cîhanê jî bi aştiyê heye.”
* Îro salvegera 54emîn a darvekirina sê pêşengên şoreşger ên Tirkiyeyê Deniz Gezmîş, Yûsûf Aslan û Huseyîn Înan e. Ev her sê ciwanên ku di 6ê Gulana 1972an de li Girtîgeha Ulucanlar a Enqereyê hatin darvekirin, ne tenê bûn sembolên têkoşîna li dijî emperyalîzmê di heman demê de bûn mîratgirekî mezin ê têkoşîna “xwişk û biratiya gelan” ku îro jî rêya têkoşîna hevpar a gelan ronî dike.
* Danişîna ewil a doza rojnameger Hakan Tosûn ê ku hatibû kuştin dê li Edliyeya Bakirkoyê bê lidarxistin. (13:00)
* MEBYA-DERa Amedê bi boneya cangoriyên meha Gulanê bi bîr bîne dê li navçeya Erxeniyê ya Amedê serdana goristanan bike. (13:00-15:00)
* Rêxistinên çep û demokratîk ji bo bîranîna pêşengên şoreşger ên Tirkiyeyê Denîz Gezmîş, Huseyîn Înan û Yûsûf Aslan dê li Qada Taksîmê meşek li bar bixin. (18:45)
