Colemêrg – Rêveberên ZIMAN-DERê ya Colemêrgê bi boneya 15ê Gulanê Cejna Zimanê Kurdî banga xwedîderketina ziman li gel kirin û diyar kirin ew ê di 15ê Gulanê de bi meşeke girseyî pêk bînin.
Kovara Hawarê di 15ê Gulana 1932an de ji aliyê Celadet Elî Bedîrxan ve li Şamê derket. Kovara Hawarê di dîroka Kurdan de yekem kovara ku bi tîpên latînî hatiye nivîsîn e. Bi minasebeta salvegera derxistina Kovara Hawarê, di sala 2006an de 15ê Gulanê weke Cejna Zimanê Kurdî hat ragihandin. Ji sala 2006an vir ve, her sal li çar aliyên Kurdistanê û derveyî welat, Kurd vê rojê bi heyecaneke mezin pîroz dikin. Îsal jî amadekariyên pîrozbahiyên 15ê Gulanê dest pê kirin. Weke her bajarê Kurdistanê, li Colemêrgê jî bi pêşengiya saziyên ziman, Cejna Zimanê Kurdî wê bi bernameyên cur bi cur bê pîrozkirin
‘Me di nava mehekê de avahiya xwe amade kir’
Hevseroka ZIMAN-DERê Esmer Tekîn bal kişand ser giringiya xebatên ziman ên li bajêr û destnîşan kir ku saziya wan berê hatibû girtin û valahiyeke mezin di nava gel de çêbûbû û wiha axiftina xwe berdewam kir: “Ev 5 meh in bê avahî xebatên xwe meşandin. Paşê me bi keda gelê xwe avahiyek dît û me bi xwe paqij kir. Di nava mehekê de me saziya xwe amade kir û serlêdanên xwe yên fermî kirin û niha jî 2 polên me û 70 xandevanên me hene.”
‘Bila gelê me yê Colemêrgê xwedî li zimanê xwe derkeve’
Esmer Tekîn bang li dayik, ciwan û xwendekaran kir û got: “Banga min berî her kesî li dayikan e. Bila gelê me yê Colemêrgê xwedî li ziman, çand û hebûna xwe derkeve. Hebûna me, zimanê me ye.”
Di 15ê Gulanê de meşa girseyî
Hevserokê ZIMAN-DERê Naîf Beyter jî bal kişand ser wateya 15ê Gulanê û diyar kir ku ev roj ji bo gelê Kurd wek netewe rojeke bi qedr û qîmet e û wiha got: “Ji bo 15ê Gulanê amadekariyên me temam in. Em ê li ber Nexweşxaneya Dewletê bi awayekî girseyî kom bibin û heta nava sûkê bimeşin. Piştî daxuyaniyê, em ê derbasî Kent Parki bibin.”
‘Em ê bi govend û stranan 15ê Gulanê pîroz bikin’
Naîf Beyter destnîşan kir ku ew ê li parkê bi cil û bergên neteweyî, govend, stran û dengbêjiyê çanda xwe pîroz bikin û bang li hemû welatiyên kir ku beşdarî vê şahiya wan bibin û xwedî li zimanê xwe derkevin.
