Colemêrg – Parlamenterê DEM Partiyê Vezîr Coşkûn Parlak bal kişand ser polîtîkayên şerê taybet yên li ser Colemêrgê tên meşandin û diyar kir ku armanca van polîtîkayan domandina ‘konsepta Dêrsimê’ ye, bişaftin û şikandina vîna pêk anîn e.
Bajarê Colemêrgê li ser sînorê hatiye çêkirin yê Îran û Îraqê ye û di navbera Bakur, Rojhilat û Başûr de cih digire. Ji ber vê yekê erdnîgariya xwe her tim bûye cîhekî stratejîk û ji bo dewlet û hêzên herêmî cîhekî taybet digire. Dewleta Tirk jî li ser Colemêrgê her tim polîtîkayên taybet meşandiye û zexta li ser welatiyan û bêhiqûqiya di nava saziyan de gur kiriye. Piştî desthilata AKPê jî ev rewş neguheriye û tevî polîtîkayên şerê taybet, AKPê saziyên dewletê kiriye bin kontrola xwe û ji bo berjewendiyên xwe bi kar tîne. Gendelî herî zêde di aliyê aborî de derkevin pêş.
Herî dawî derket holê ku li ÎŞKURê gendelî û rizîbûnek cidî hatiye meşandin. Hat zanîn ku li wir xistina kar ne li gorî pêdivî û hewcehiyan lê li gorî têkilî û berjewendiyên çend kesan hatiye meşandin. Her wiha polîtîkayên têkildarî pêvajoya Aştî û Civaka Demokratîk tên meşandin nîşan didin ku çareserî ne wek stratejiyeke dewletê lê wek taktîkekê tê dîtin.
Parlementerê DEM Partiyê yê Colemêrgê Vezîr Coşkûn Parlak têkildarî polîtîkayên li ser Colemêrgê tên meşandin, gendeliyên li ÎŞKURê tên kirin û Pêvajoya Aştî û Civaka Demokratîk axivî.
‘AKPê hemû saziyên dewletê xistine bin fermana xwe’
Vezîr Parlak bal kişand ser bandor û giraniya AKPê ya li ser saziyên dewletê û wiha û got: “Dema em li rewşa Colemêrgê dinêrin, em dibînin ku ji sala 2013an ve desthilata AKPê hemû saziyên dewletê xistine bin fermana xwe û bêyî ku ji kesî bipirsin, biryaran didin. Mînak, bîst û sê sal in rêyên vî bajarî hatine girtin û rêyeke alternatîf nehatiye avakirin. Ji ber ku sed sal in bi çavê ‘ewlekariyê’ li bajarên me dinêrin, ne ji bo xizmetê. Dibêjin bila gelê Kurd serê xwe raneke û nebe hêzeke mezin. Tevî ku gelê me bi dîrokî her tim bi hêza xwe û bi tifaqa êl û eşîran xwe parastiye jî, îro dixwazin me bêxwedî nîşan bidin. Lê em dibêjin, Colemêrg ne bêxwedî ye, xwediyê vî bajarî em in. Ger em mil bidin hev û tifaqa xwe xurt bikin, em dikarin dewletê mecbûr bikin ku li şûna polîtîkayên ewlehiyê, xizmetê bike. Ji ber ku ew pereyên dewletê hemû ji bac û berîka vî gelî derdikevin.”
‘ÎŞKUR weke saziyeke propagandayê ya AKPê dixebite’
Di berdewamiya axaftina xwe de Vezîr Parlak anî ziman ku ÎŞKUR veguheriye saziyeke propagandaya AKPê û ev tişt lê zêde kir: “Mînakeke din a şerê taybet jî saziya ÎŞKURê ye. ÎŞKUR îro ne saziyeke dewletê, lê wekî saziyeke propagandaya AKPê dixebite. Kesên ku di nava xebatên siyasî yên AKPê de cih digirin, wekî xelat meaşê xwe ji wir digirin. Lê kesên hejar û xwedî rûmet yên ku nakevin bin xizmeta vê hişmendiyê, navê wan nayê nivîsandin. Bi vê rêyê tolê ji gelê Kurd hildidin. Armanc ew e ku civakê bi hev bixin, vîna gel tasfiye bikin û tevgera azadiyê lawaz bikin. Ev eynî konsepta Dersîmê ye ku îro Colemêrg û Şirnexê wekî laboratuarekê bi kar tînin.”
‘Armanca qeyim ne xizmet, lê darbe ye’
Vezîr Parlak, di berdewamiya axaftina xwe de behsa polîtîkayên qeyiman kir, diyar kir ku polîtîkaya qeyiman îradeya gel desteser kiriye û wiha pê de çû: “Polîtîkayên qeyiman jî mînaka desteserkirina îradeya gel e. Heşt sal in şaredarî di destê wan de ye, ew naxwazin gelê Kurd xwe bi rê ve bibe. Ger şaredarî di destê me de bûya, îro gelê Colemêrgê ava qirêj venedixwar. Îro mirovên me ji ber ava şêlî nexweş dikevin û diçin nexweşxaneyan. Di heşt salan de çima we pirsgirêka avê û rêyan çareser nekir? Çima we li dijî xwekuştinan xebatek nemeşand? Ji ber ku armanca qeyim ne xizmet, lê darbe ye.”
‘Dadger û dozger wekî mîlîtanên AKPê dixebitin’
Di berdewamiya axaftina xwe de Vezîr Parlak bal kişand tayînkirina qeyim a li ser Şaredariya Colemêrgê, cezayê li hevşaredar Mehmet Siddik Akiş hatiye birîn. Vezîr Parlak da zanîn ku daraz veguheriye amûreke polîtîk û domdarî wiha got: “Tayînkirina qeyiman weke darazê bi kar tînin. Dadger û dozger wekî mîlîtanên AKPê dixebitin. Doza ku di sala 2009an de li Mehmet Siddik Akiş vekiribûn, bi destê cemaata Fethullah Gulen hatibû vekirin û îro jî nû dikin. Dozgerê wê dozê fîrar e, serokê mehkemeyê girtî ye, lê îro AKP bi heman dosyayan cezayê didin hevşaredarê me. Hemû tawanbarî li ser axaftinên telefonê yên kurdî ne ku asayîşê ew bi xeletî wergerandine û ti delîleke berbiçav di destê wan de nîne.”
‘Bi kirinên xwe ve pêvajoyê sabote dikin’
Vezîr Parlak anî ziman ku desthilatdarî bi polîtîka û kirinên xwe ve pêşî li çareseriyê digire û ev tişt gotin: “Dixwazin pêşiya çareseriyê bigirin. Dibêjin cemaetê pêvajoya çareseriyê xira kir, lê ferqa we ji wan nîne. Hûn bi qeyiman û bi nenasîna vîna gel, vê pêvajoyê sabote dikin. Ev peyamek e ku dixwazin gelê Kurd ji xeta Rêbertiya xwe ya ku xwedî lê derdikeve, dûr bixin. Ev hemû parçeyekî şerê taybet e. Lê bila baş bizanibin, hevalên me yên di zindanê de serê xwe netewandin û natewînin. Gelê Kurd piştî şoreşa Rojava êdî di asta cîhanê de bûye xwedî hêz. Em ê bi siyaseta demokratîk û bi gelê xwe re ser bikevin. Heta ku hevalen me ji zindanê derbikevin, em ê li ber xwe bidin û têkoşîna xwe mezintir bikin.”
‘Konsepta Dêrsimê’ tê domandin’
Herî dawî Vezîr Parlak diyar kir ku li Colemêrgê bi awayeke domdarî polîtîkayên rizandin, bê vîn hiştinê tên domandin û wiha derbirî: Rêjeya xwekuştinê gelek bilind e. Zêdebûna rêjeya xwekuştinan ne tesaduf e, li gorî meşandina ‘Konsepta Dersîmê’ ye û armanc bişaftin û şikandina vîna civakê ye. Îro li Colemêrgê bi hişmendiya şerê taybet dixwazin gelê Kurd ji tevgera azadiyê û ji xeta xwe ya exlaqî-polîtîk dûr bixin. Ev mijarek gelekî kûr û berfireh e.”
