DYAyê li nêzî Tengava Hurmuzê 4 dronên Îranê xistin xwarê û li Bender Ebasê êrişî stasyoneke kontrolê kir. Hêzên Pasdaran ên Îranê jî bi moşekan bersiv dan û baregeheke DYAyê kirin hedef. Ji ber êrişên dualî nirxê petrolê li cîhanê dîsa bilind bû. Êrişên DYAyê wekî zextek têkildarî muzakereyan hate nirxandin.
Ligel berdewamkirina muzakereyên xitimîn, di navbera hêzên Dewletên Yekbûyî yên Amerîkayê (DYA) û rejîma Îranê de êrişên rasterast ên leşkerî pêk hatin. Rayedarekî DYAyê ragihand ku hêzên wan li nêzî Tengava Hurmuzê 4 dronên Îranê xistine xwarê û li bajarê Bender Ebas ê li peravên başûrê Îranê jî, stasyoneke bejayî ya kontrolkirina dronan kirine hedef. Çavkaniyên DYAyî daxuyandin ku êriş li dijî nêzîkatiya Îranê ya muzakereyan pêk hatiye.
Îranê bi moşekan li baregeha DYAyê xist
Li hemberî êrişa DYAyê, Artêşa Pasdarên Şoreşê ya Îranê daxuyaniyek weşand û da zanîn ku wan di seatên sibê de bi moşekan baregeheke DYAyê ya ji wir êrişî nêzî Balafirgeha Bender Ebasê kiribû, kiriye armanc. Di daxuyaniyê de der barê cihê baregeha DYAyê û zirarên bombebaranê de agahiyên berfireh nehatin dayîn.
Li Kuweytê û Tengava Hurmuzê alarm
Bandora vê rageşiyê li welatên din ên herêmê û qadên deryayî jî hate hîskirin. Artêşa Kuweytê ragihand ku sîstema wan a parastina asmanî bersiv daye êrişên moşek û dronan, lê der barê jêdera êrişê de hûrgilî parve nekirin.
Keştî ji hêla Îranê ve hatin hişyarkirin
Di heman demê de, Saziya Radyo û Televîzyonê ya Îranê jî da zanîn ku hêzên deryayî yên Îranê hişyarî daye 4 keştiyên ku xwestine bêyî koordînasyonê di Tengava Hurmuzê re derbas bibin. Hate destnîşankirin ku keştiyên navborî destpêkê guh nedane hişyariyan, lê piştre hatine neçarkirin ku vegerin.
Bandora şer: Nirxê petrolê firî
Şer û rageşiya leşkerî ya li herêma Kendavê, rasterast bandor li bazarên aboriyê yên cîhanê kir. Piştî êrişên dualî, nirxê bermîlek petrola xam a Brentê ji sedî 2 zêde bû û derket 96.13 dolaran. Her wiha nirxê petrola Teksasê (WTI – West Texas Intermediate) jî ji sedî 1.75 zêde bû û gihîşt 90.23 dolaran.
Peyama Tehranê: Îhtîmala şer kêm e, lê em amade ne
Tevî şerê fîîlî jî, rayedarên Îranê hewl didin rageşiyê di çarçoveyeke diyarkirî de bihêlin. Yek ji fermandarên payebilind ên Hêzên Deryayî yên Artêşa Pasdaran Mûhammed Ekberzade duh ji ajansa Tasnîmê re axivîbû û îdia kiribû ku ji ber “lawaziya dijmin” îhtîmala şerekî giştî kêm e.
Rêveberiya Tehranê jî destnîşan kir ku ligel berdewamiya hevdîtinên dîplomatîk, ew li hemberî her cure êrişên gengaz di nava amadekariyê de ne.
