Kongra Star êrişa li dijî endama Koordînasyona Kongra Star Hêva Erebo şermezar kir û ji hemû jinan xwest ku asta têkoşîna xwe bilind bikin.”
Kongra Star a Kantona Firatê di derbarê şehadeta endama Koordînasyona Kongra Star Hêva Erebo (Salîhe Viyan) de daxuyanî da. Endama Kongra Star Meysûd Kawar li qada Jina Azad daxuyanî da. Meysûd Kawar diyar kir ku sûcên Dewleta Tirk a dagirker li dijî şoreşa jin her ku diçe zêdetir dibe û got: “Li bakur û rojhilatê Sûriyê ji bo çewisandina şoreşa jinê bi rojane komkujiyan pêk tîne. Di 27ê çileyê de Dewleta Tirk a dagirker ji bo qirkirin û tunekirina îradeya şoreşa jinê li Ranyayê bi balafireke bêmirov êrîşî hevalên me kir. Di encamê vê êrîşê de endama Koordînasyona Kongra Star Salihe Viyan û endamê PYDê Dîlawer Erebo Şehîd bûn.”
Meysûd Kawar da zanîn ku Salihe Viyan yek ji wan jinên pêşeng ê ku di avakirina pergala Rêvebiriya Xweser de rol girtibû û wiha axivî: “Di xebatên avakirina civaka demokratîk de xwedî rolekê avaker bû. Ji bo rêxistinkirina jinan û avakirina hevjiyana azad a di navbera jin û mêr de kar û dixebitî. Li beramberî hemû cure tundiyê, bêhuqiqî û zayendperestiyê li ber xwe da û têkoşiya. Ev êrîşa ku li hember Salihe Viyan pêk hat, carekê din piştrast kir ku dewleta Tirk a dagirker ji têkoşîna jina azad û şoreşger ditirse. Em wek Kongra Star êrîşa li dijî herdu pêşengên tevgera me ya azadiyê şermezar dikin û soz didin ku em ê mîrateya wan bigihînin azadiyê. Em bang li hikûmeta Başûrê Kurdistanê û hikûmeta Iraqê dikin, da ku li hemberî vê êrîşê bêdeng nemînin. Ev êrîş, binpêkirina serweriya Iraqê ye.”
Meysûd Kawar bang li hemû hêzên navnetewî, saziyên mafê mirovan û rayagiştî kir ku ji dewleta Tirk a dagirker hesab bixwazin û wiha berdewam kir: “Bêdengiya rayagîştî tê wateya pejirandina van êrîşan. Ji ber vê divê helwesta xwe raber bikin. Her wiha em bang li hemû jinan dikin ku asta têkoşîna xwe bilind bikin. Têkoşîna jinên bakur û rojhilatê Sûriyê rizgariya hemû jinan e.”
Jinan di dawiya daxuyaniyê de dirûşmaya, “Jin Jiyan Azadî” berz kirin.
