Gelek rojnamevan û çalakvan wêneyê rojnameger Gulistan Tara û Hêro Bahadîn li cihê ku lê hatin kuştin danîn û navê wan li kolana lê hatin kuştin kirin. Rojnamegeran destnîşan kirin ku ew ê li ser şop û rêya hevrêyên xwe têkoşînê bilind bikin.
Gelek rojnamevan û çalakvanên siyasî li ser rêya nêzîkî navçeya Seyîdsadiq a Silêmaniyê wêneyên endamên Çapemeniya Azad Gulistan Tara û Hêro Bahadîn li cihê ku lê şehîd bûbûn danîn û ji bo ku her dem bên bîranîn navê ‘Cadeya Rojnamevanên Şehîd Gulistan Tara û Hêro Behadîn’ li kolanê kirin. Kampanya Çetir li vir daxuyaniyek da.
Rojnameger Havrê Karwan daxuyaniya Kampanya Çetir xwend û wiha got: “Ew çiqasî rojnamevanan bikin hedef û şehîd bikin dê navê wan li rê û kolanan heta heta bimînin. Ew ê bibin sembol. Hikûmet bi rêya kuştin û zextê ya li ser rojnamevanan mafê gihandina agahiyan a civakê binpê dike. Di roja îro de ji ber berjewendiyan şerê tê kirin li Rojhilata Navîn bûye navenda cengê. Herî zêde ev şer li Kurdistanê ye û herî zêde mafê Kurdan heye ku agahiyên rast bigire. Ji bo wê hemû hewldan tê danîn ku rojnamevanan bêdeng bikin ku rastiyan ne ragihînin. Li her derê cîhanê rojnamevan tên kuştin ji bo rastî di tarîtiyê de bimîne. Kuştina rojnamevanan sûce û êrişeke li ser mafê mirovane. Rojnamevan Gulistan Tara û Hêro Bahadîn ji ber rastiyên sûcên şer kifş kirin bûn hedefa dagirkeran.”
Havrê Karwan li ser êrişa li Çarqûrne ya ku rojnager Azîz Koyluogu hat kuştin jî axivî û got: “Şehîdkirina rojnameger Azîz Koyluoglû bû deqeke din a reş li ser rûyê desthilat û hikûmetê. Ev yek nîşan dide ku dagirker û dardestên wan çiqas ji rastiyan ditirsin.”
Di 23yê Tebaxa 2024an di encama êrişeke balafirên bêmirov û biçek ên dewleta Tirk a li Seyîdsadiq a Silêmaniyê karwanê rojnamegeran bû hedef û di encamê de rojnameger Gulistan Tara û Hêro Bahadîn jiyana xwe ji dest dan.
Êrîş lawaziya hikûmetê nîşan dide
Çalakvanên tev li daxuyaniyê bûn ji ROJNEWSê re re axivîn. Çalakavan Herêm Ebûbekir diyar kir ku wan îro xwest rêya esasî ya Helebce-Silêmanî- Seyîdsadiq bi nave du şehîdên jin ên rojnamevan biguherînin û got: “Ev ne şehîdên me yên destpêkê ne. Çiqasî dijmin ji dengê azad bitirse, ji bo wê ewqasî êriş dibe ser rojnamevan û kesên çalakvan. Ev yek jî bêhêzî û desthilata wan nîşan dide.”
Ebûbekir diyar kir ku çiqas dijmin rojnamevan û çalakvanan bikin hedef û şehîd bikin, ewê wan bikin sembolên xwe û wiha axivî: “Navê wan şehîdan li cihên lê şehîd bûne dikin û wefadariya xwe ji bo wan nîşan didin.”
