Midûrê Karên Nivîsan ê Rojnameya Azadiya Welat Rohat Aktaş, rêveberê DBPê Mehmet Yavuzel û Mazlum Yeşîl ku li navçeya Cizîrê hatibûn kuştin, li ser gorên xwe yên li navçeya Pirsûsê hatin bibîranîn.
Midûrê Karên Nivîsan ê Rojnameya Azadiya Welat Rohat Aktaş dema qedexeya derketina derve ya li navçeya Cizîra Şirnexê dişopand, di jêrzemîna avahiyekî de hatibû kuştin û cenazeyê wî di 26ê Sibata 2016an de hatibû veşartin. Aktaş û endamê Meclisa Partiyê (PM) yê Partiya Herêmên Demokratîk (DBP) Mehmet Yavuzel û Mazlum Yeşîl ku li heman jêrzemînan hatibûn kuştin, li ser gorên xwe yên li navçeya Pirsûsa Rihayê hatin bibîranîn. Malbatên Aktaş, Yavuzel û Yeşîl, Komeleya Rojnamegeran a Dîcle Firatê (DFG), Komeleya Rojnamegerên Jin a Mezopotamyayê (MKG), Platforma Ked û Demokrasiyê, rêveberên Partiya Wekhevî û Demokrasiyê ya Gelan (DEM Partî), Komeleya Alîkarî, Piştevanî û Çandê ya bi Malbatên Xizmên Xwe li Xaka Qedîm Winda Kirin re (KATDER) û gelek welatî tev li merasîma bîranînê ya li Goristana Asrî ya Pirsûsê bûn.
Polîsan bi hinceta “Goristan qada cemaweriyê ye, lidarxistina çalakiyan a li qadên cemaweriyê qedexe ye, wateyeke taybet a dîroka we hilbijartî heye, yek yek werin” xwestin bîranînê asteng bikin. Beşdaran bertek nîşan dan û li ber deriyê goristanê çalakiya rûniştinê li dar xistin. Piştî çalakiya rûniştinê daxuyanî hate dayîn.
‘Tu demê deriyê goristanan nehatine girtin’
Hevserokê DEM Partiya Rihayê Bekir Karakeçîlî bertek nîşanî astengkirinê da û got: “Em ê her tim di rêya wan de bin. Em ê ala wan dewrî me kirin her tim li ba bikin. Di tu olan de deriyên goristanan nehatine girtin. Lê dema mijara behsa xeberê dibe Kurd, deriyên goristanan tên girtin. Serê gelê me sax be.”
Parlamenterê DEM Partiyê yê Rihayê Ferît Şenyaşar jî anî ziman ku Yavuzel, Aktaş û Yeşîl li pêş çavên hemû dinyayê bi hovane hatine qetilkirin û wiha got: “Polîsên AKPê deriyên goristanan digirin. Ev, hiqûqa dijminatiyê ye. Em ê heta dawiyê xwedî li têkoşîna hevalên xwe derkevin.”
‘Bûn dengê heqîqetê’
Nûnerê Basin-Îşê rojnameger Hakki Boltan jî bi bîr xist ku Rohat Aktaş li pey heqîqetê bû û wiha axivî: “Li cihên herî zehmet rojnamegerî kir. Nûçe ji me re şand. Bû dengê heqîqetê. Dema birîndar jî nûçe şand. Lê ji bo alîkariyê tu tiştek nehate kirin. Kesekî guh neda banga wî ya alîkariyê. Wê demê jî me got; ‘Berpirsyar îktîdar e, wan asteng kir.’ Der heqê me de dosya vekirin. Ev doz nikarin me bitirsînin. Heta dawiyê em ê bibin şopdarên heqîqetê. Em soz didin Rohat û hevalên wî. Astengkirina serdana goristanê şerma wan e. Ev dîmenê şermê berhema wan e. Yên ferman dayin şirîkên vî sûcî ne. Rojnamegerî sûc nîne. Kes nikare Çapemeniya Azad bêdeng bike.”
Qerenfîl danîn ber deriyê goristanê
Piştî daxuyaniyê, beşdaran xwest qerenfîlan deynin ser goran lê destûr nehat dayîn û qerenfîl bi ser dîwar re avêtin ber deriyê goristanê. Lê belê polîsan hewl dan asteng bikin. Bîrnameya bîranînê bi lêdana çepikan bi dawî bû.
Bi dû bîranînê re girse çû serdana malbata Rohat Aktaş a li navenda navçeyê.
