Hat diyarkirin ku ji rojnameger Swêdî Joakim Medin ê ku ji bo şopandina çalakiyên li Tirkiyeyê hat Stenbolê, du roj in agahî nayê girtin.
Rojnameya Dagens ETC ya Swêdê ragihand ku rojnameger Joakim Medin ê ku ji bo şopandina çalakiyên şermezarkirina girtina Şaredarê Bajarê Mezin a Stenbolê Ekrem Îmamoglû, hat Stenbolê agahî jê nayê girtin.
Her çiqas hin malperên nûçeyan ragihandin ku Joakim Medin hatiye girtin jî lê tu agahî jê nayê girtin. Parêzerên endamên Komeleya Hiqûqnasên ji bo Azadiyê (OHD) ji bo ku agahî ji rojnameger werbigirin di nava hewldanan de ne. Hat zanîn ku duh parêzer çûne Girtîgeha Maltepeyê lê ji wan re hatiye ragihandin ku kesek wisa li girtîgehê nîn e.
Gerînendeyê Weşana Giştî yê rojnameyê Andreas Gustavsson diyar kir ku du roj in agahî ji Joakim Medin nagirin. Gustavsson anî ziman ku Medin di hevdîtina dawî de gotiye ku ew hatiye binçavkirin.
Rêveberên rojnameya ETCê destnîşan kir ku wan bi Wezareta Karên Derve re têkilî danîne lê ti encam bi dest nexistine.
Andreas Gustavsson derbarê Medin de ev tişt anî ziman: “Zêdetirî 24 saet derbas bû. Nizanim ew li ku derê ye. Nizanim rewşa wî çawa ye. Ger bê lêpirsînkirin, na. Ger were dersînorkirin, na. Em li Dagens ETCê hewl didin ku bi rêya kanalên cuda (Wezareta Karên Derve û ji bo konsolosxane jî di nav de) derbarê wî de agahiyê wergirin. Azadiya çapemenî di bin gefê de ye, ez ji hukûmeta Swêdê daxwaz dikim ku bikeve nava liv û tevgerê.”
