Riha – Meşvanên Amarayê 3 rojin ber bi Amarayê ve dimeşin. Gelek ciwan ji Kurdistanê û Tirkiyeyê hatin tev li meşê bûn. Li gel ciwanan kal û pîr jî hene. Meşwanên ku tev li meşê bûn, diyar kirin ku ew ê mal bi mal azadiya Rêberê Gelê Kurd Abdullah Ocalan bînin ziman.
Meclîsa Ciwanan a Partiya Wekhevî û Demokrasiyê ya Gelan (DEM Partî) di 1ê Nîsanê de bi boneya 76emin salvegera rojbûna Rêberê Gelê Kurd Abdullah Ocalan ji Qada Şêx Seîd ber bi gundê Amara ve dest bi meşe kir. Ciwan roja yekem ji gundê Pirîmçikê ber bi Sêwêregê ve meşiyan. Roja dûyemin meşwan ji Sêwêrêgê ber bi Curna Rêş û bajaroka Elîgora Pirsûsê meşiyan. Ciwan li gund û navçeyên ku lê rawestiyan ji aliyê welatiyan ve bi girseyî û coş hatin pêşwazîkirin. Meşvan meşa xwe ya bi coş û kelecan berdewam dikin. Meşvan di meşê de azadiya fizikî ya Rêberê Gelê Kurd Abdullah Ocalan dixwazin. Di meşê de ne tenê ciwan henê. Her wiha kal û pîr jî hene. Meşvanên tev li meşê bûn li ser armanca meşê ji Ajansa Welat (AW) re axivîn.
Azadiya Serok azadiya gelê Kurd e
Kalê 83 salî Abdûlhafiz Çîftçî ku li gel ciwanan tev li meşê bûye diyar kir ku ew ji bo azadiya fizîkî ya Rêberê Gelê Kurd Abdullah Ocalan ji Colemergê tev li meşe bûye û got: “Ez 83 salîme. Ez ji bo biçim Amara û rojbûna Serokê xwe pîroz bikim tev li meşê bûm. Ez bibim sed salî jî ez ê li pişt Serokê xwe bim. Serok tunebe jiyana me jî tune ye. Em ji bo Serokê xwe dijîn. Heta ku Serok azad nebe em jî azad nabin azadiya Serok azadiya gelê Kurd e. Bi armanca ez bi gelê xwe re azadiya Serokê xwe bixwazim dimeşim. Ez dixwazin bi gel re rojbûna Serokê xwe pîroz bikin. Ev meş dê peyamê bide tevahiya gelê Kurdistan û Tirkiyeyê. Êdî bindestî bes e. Em ê bi Serokê xwe re azad bibin. Ji bo Serokê xwe em ê her tim li berxwe bidin. Ev meş 100 roj jî bidome ez ê ji bo Serokê xwe bimeşim”
‘Ev meş dê bibe wesîleya azadiya Rêberê me’
Yek ji beşdarê meşê jî ciwanê bi navê Hîvron Taştan e. Hîvron Taştan anî ziman ku ji bo azadiya Rêberê Gelê Kurd dimeşe û got: “Ez ji Wanê hatim û tev li meşe bûm. Ji bo azadiya birêz Abdullah Ocalan û gelê Kurd tev li meşe bûm. Hêvîdarim ku em ê bigêjin armanca xwe. Me ji Amedê dest bi meşê kir. Ji ber ku Amed dilê Kurdan e. Em ê herin Amara rojbûna Serok pîroz bikin. Em hêvî dikin ku ev meş bibe wesîleya azadiya Rêberê me. Ciwan divê her dem li pêş bin. Îro Rêberê Gelê Kurd bangek daniyê pêşiya me. Em jî ji bo piştgiriyê bidin vê bangê di nav têkoşîne de ne.”
‘Rojbûna Serok rojbûna me ye’
Meşwan Sacîd Ozdemîr jî da zanîn ku dê ji bo azadiya Rêberê xwe berxwedana xwe mezin bikin û wiha axivî: “Em ji bo Serokê xwe dimeşin. Em ê herin Amara û rojbûna Rêberê xwe pîroz bikin. Rojbûna Serok rojbûna me ye. Ji ber ku Amed paytexta gelê Kurd e me jî Amedê destpêkir. Heta ku Serokê me azad nebê meşa me tu bi carî dawî nabê. Em ê her dem bimeşin. Daxwaza me azadiya fizikî ya Serokê me ye.”
