Girtiyên bi navê Ahmet Başboga, Şakir Akkurt û Muhîttîn Altin piştî 32 salan hatin berdan.
Ahmet Başboga û Şakir Akkurt piştî 32 salan ji Girtîgeha Tîpa S a Doşemealti ya Antalyayê hatin berdan. Başboga û Akkurt di sala 1993yan de bi îdiaya “Xerakirina yekitî û yekparetiya dewletê” hatin girtin û cezayê muebedê lê hate birîn. Her du girtî îro hatin berdan. Başboga û Akkurt, li pêşiya girtîgehê ji hêla xizmên xwe û rêveberên Komeleya Piştevaniya bi Malbatên Girtiyan re (TUAY-DER) ve hatin pêşwazîkirin.
Başboga û Akkurt diyar kirin ku ji rexekî ve keyfxweş û ji rexekî ve jî xemgîn in û gotin ku ew piştgiriyê didin “Banga Aştî û Civaka Demokratîk” a Rêberê Gelê Kurd Abdullah Ocalan. Başboga û Akkurt hêvî kirin ku hemû hevalên wan ên girtî bên berdan.
Başboga çû cem malbata xwe ya li Manîsayê û Akkurt jî ji bo biçe cem malbata xwe ya li Êlihê bi rê ket.
Xarpêt
Girtî Muhîttîn Altin jî piştî 32 salan ji Girtîgeha Ereglî ya Konyayê hat berdan. Li Xarpêtê ji aliyê malbat û nasên xwe ve hat pêşwazîkirin. Altin di meha Mijdara 1993yan de li Çewligê bi îdiaya “Xerakirina yekitî û yekparetiya dewletê” tê girtin û cezayê muebedê lê tê birîn.
Altin bi dorê li girtîgehên Amed, Gumuşhane, Enqere, Galikesîr, Konyayê hat ragirtin û du caran berdana wî hat taloqkirin. Lewma berdana wî bi derengî ket. Altin piştî hat berdan li bajarokê Perçençê ya bi ser Xarpêtê bi girseyî û coş hat pêşwazîkirin.
