Amed – Şaredariya Bajarê Mezin a Amedê ji ber biryara 3yemîn Dadgeha Îdareyê ya Amedê navê Bûlvara Şêx Seîd guhert û kir Bûlvara Azadiyê.
Meclisa Şaredariya Bajarê Mezin a Amedê duh navê Bûlvara Şêx Seîd a bi biryara dadgehê hatiye betalkirin weke ‘Bûlvara Azadiyê’ guhert. Şaredariya Bajarê Mezin a Amedê di sala 2024an de navê Şêx Seîd li bûlvara ku li ser rêya Xarpêt û Farqînê nû hatibû çêkirin kiribû. Piştî vê biryarê Partiya Zaferê ji bo ku nav bê guherîn serî li dadgehê dabû. 3yemîn Dadgeha Îdareyê ya Amedê jî biryara Şaredariya Bajarê Mezin a Amedê betal kiribû. Şaredariya Bajarê Mezin a Amedê, Komeleya Şêx Seîd, Komeleya Hiqûqnasên Ji Bo Azadiyê (OHD) û Baroya Amedê îtîrazî vê biryara dadgehê kiribû lê tevî vê yekê jî biryara betalkirinê hatibû dayîn. Beriya du mehan Şaredariya Bajarê Mezin a Amedê ji bo ku dîsa navê Şêx Seîd li bûlvarê bike serî li Walîtiya Amedê dabû. Walîtiya Amedê jî biryara betalkirina dadgehê weke hincet nîşanda û biryara Şaredariya Bajarê Mezin a Amedê red kir û ji bo nav bê guhertin du meh wext dabûn şaredariyê. Şaredariya Bajarê Mezin a Amedê jî ji ber vê yekê ji bo navekî din li bûlvarê bike duh Meclisa xwe kom kir û li ser pêşniyaran navê bûlvarê kir ‘Bûlvara Azadiyê’.
Walîtiya Amedê biryara şaredariyê red kir
Me wekî Ajansa Welat, bi boneya rastiyê fêr bibin xwe gîhand şaredariyê. Endama Meclisê ku nexwest navê xwe bide têkildarî guherîna navê bûlvarê agahî dan. Endama Meclisê diyar kir ku wan du meh berê weke Şaredariya Bajarê Mezin ji bo ku dîsa navê Şêx Seîd bidin bûlvarê serî li Walîtiya Amedê dabûn û wiha got: “Walîtiya Amedê piştî du mehan ji serlêdana me re bersiv da û biryara dadgehê nîşan da. Walîtiyê got ku hûn nikarin navê Şêx Seîd bidin vê bulvarê. Ji ber vê yekê Meclisa me ya Şaredariya Bajarê Mezin ji bo ku navekî din bide bûlvarê duh kom bû. Meclisê piştî nîqaş û pêşniyaran navê ‘Azadî’ da bûlvarê.”
‘Biryara şaredarîyê em neêşand in’
Li ser vê mijarê em bi Komeleya Şêx Seîd re jî axivîn. Alîkarê Serokê Komeleya Şêx Seîd Ramazan Ari têkildarî mijarê wiha got: “Xwezî Şaredarîya Bajarê Mezin a Amedê beriya girtina biryarê, bi me re danûstendina fikrê kiribûya. Em ji ber vê yekê şaredariyê rexne dikin. Dayîna navê Azadî jî em neêşand in, ji ber ku navê Hereketa Şêx Seîd jî Hereketa Azadî bû. Derbarê vê mijarê de em ê daxuyaniyekê bidin.”
