Parlamentera DEM Partiyê Newroz Ûysal Aslan diyar kir ku azadiya girtiyan bi rengekî kêfî tê binpêkirin.
Parlamentera DEM Partiyê ya Şirnexê Newroz Ûysal Aslan li Meclisê civîneke çapemeniyê li dar xist û bal kişand ser binpêkirina mafên mirovan ên li girtîgehan.
Newroz Ûysal anî ziman ku Desteyên Çavdêrî û Îdareyê bi rêk û pêk zextê li girtiyên siyasî dike û got ku ev deste bi rengekî neqanûnî û nedestûrî azadiya mirovan binpê dikin.
Newroz Ûysal Aslan diyar kir ku li Girtîgeha Tîpa T a Aksarayê girtiyekî bi tenê yê siyasî jî neketiye ber ‘biryara rewşa baş’ û ji ber vê yekê jî berdana wan bi kêfî tê astengkirin. Newroz Ûysal anî ziman ku deste pirsên siyasî ji girtiyan dipirse, weke dadgehê tevdigere û ev pêvajo veguheriye rewşeke darizandinê. Newroz Ûysal lewma jî xwest Desteyên Çavdêrî û Îdareyê tavilê bên rakirin.
Newroz Ûysal Aslan her wiha bal kişand ser tecrîda giran a li girtîgehên bi tîpên Y û S û anî ziman ku girtiyên li van girtîgehan di greva birçîbûnê de ne û divê ev girtîgeh bêne girtin.
