Girtî Necla Yildiz a ku înfaza wê ji bo 2 salan hatibû şewitandin, ji Girtîgeha Jinan a Sîncanê derket. Necla Yildiz ji aliyê malbat û hevalên xwe ve bi kûlîlkan hat pêşwazîkirin.
Necla Yildiz (30) a di meha gulana 2016an de li Konyayê bi hinceta “endamtiya rêxistinê” hatibû binçavkirin û girtin, ji Girtîgeha Jinan a Sîncanê derket. Necla Yildiz a ku diviyabû di Sibata 2023an de bihata berdan, lê bi hinceta ku “nikare derkeve derve, nikare bi civakê re bikeve têkiliyê û guman heye ku dîsa sûc bike” înfaza wê ji aliyê saziya înfazê ve bi qasî 2 salan hat taloqkirin. Necla Yildiz li ber deriyê girtîgehê ji aliyê malbat û hevalên xwe ve bi kûlîlkan hat pêşwazî kirin.
Necla Yildiz bal kişand ser girtiyên nexweş û diyar kir ku hevalên wan ên ku dihatin dermankirin nehatin berdan û wiha got: “Rast e ez 9 salan di girtîgehê de mam, lê hevalên me yên beriya ku ez ji dayik bibim di girtîgehê de ne û hevalên me yên nexweş jî hêj di girtîgehê de ne. Em bi dilsozî tev li vê têkoşînê bûn e û em deyndar in. Em çiqas vî deynî bidin em ê ewqas jî dewlemend bibin.”
