Hevseroka MXDŞê Cîhan Celo der barê koçberiya li Sûriyeyê û kampanyaya alîkariyê ya ku dane destpêkirin de nirxandin kir û got: “Em dibêjin Şengal û Rojava yek in lê bi diwarê ku Iraq û PDKê di navbera me de daniye têkiliya me qut kiriye. Ne ji vî diwari bûna dê şengaliyan ji bo axa Rojava canê xwe feda bikirana.”
Kaosa di nav Sûriyeyê de di 27ê Mijdarê de gihişt lûtkeyê û hê jî berdewam dikin. Ji roja destpêka êrîşên ku li ser Sûriyeyê pêk tên heta niha gelek kes ji bo ji komkujiyên çeteyan rizgar bibin neçarê koçberiyê bûn. Kesên ku koçber bûn niha hewl didin ku bigihînin cihek bi ewle û pêwistiyên xwe yên jiyanî bi dest bixin. Gelê Şengalê jî bi pêşengiya Meclîsa Xweseriya Demokratîk a Şengalê (MXDŞ) kampanyayeke alîkariyê da destpêkirin. Hevseroka MXDŞê Cîhan Celo der barê kampanyaya alîkariyê ya ku ji bo Bakur û Rojhilatê Sûriyeyê dane destpêkirin ji Ajansa Welat re axivî.
Hevseroka MXDŞê Cîhan Celo di destpêka axaftina xwe de got ku berxwedana ku gelên Bakur û Rojhilatê Sûriyeyê li di dijî çeteyan didin pîroz e û ev tişt anî ziman: “Niha herêma Bakur û Rojhilatê Sûriyeyê di rewşeka giran de derbas dibe. Ji aliyeke ve êrîşên çeteyên paramîlîter ji aliyê din ve koçberî diqewime.”
Cîhan Celo der barê koçberiya ku li gelemperiya Sûriyeyê tê meşandin de wiha got: “Me 10 sal berê rewşa ku niha bi taybet li Şehba û Helebê tê jiyîn, tecrûbe kir. Ji ber vê yekê em rewşa ku îro koçber dijîn hîs dikin û fêm dikin. Ji ber ku em wê zehmetiyan ku kesên neçarê koçberiyê bûne hîs dikin îro ji bo ku alîkarî bidin wan me dest bi kampanyayeke kir.”
‘Me bi xwîna zarokên xwe Rojava rizgar kir’
Cîhan Celo zehmetiyên ku wan kişandibû bi bîr xist û wiha dirêjî da axaftina xwe: “Ji aliyek de em gelê Bakur û Rojhilatê Sûriyeyê hîs dikin. Lê ji aliyekî ve em xwe deyndarê wan jî dibînin. Ji ber ku dema DAIŞê êrîşê me kir wan ji me re deriyên malên xwe vekir. Bi xwîna zarokên Rojave Şengal hat rizgarkirin. Ji ber vê yekê ye ku em dibên divê herkes alîkarî bide kesên ku niha li Bakur û Rojhilatê Sûriyeyê di bin êrîşan de ne.”
Diwarê di navbera Şengal û Rojava de
Cîhan Celo di berdewamiya axaftina xwe de got: “Bi kampanyaya ku me li Şengalê daye destpêkirin em hewl didin ku alîkariya betanî, balîf, doşek, pêwistiyên jin û zarokan bigihînin koçberan. Em dibên Şengal û Rojava yek in lê mixabin bi diwarê ku di navbera me de hatiye bicihkirin re têkiliya me hatiye qutkirin. Jixwe armanca vî diwarê ku ji aliyê Dewleta Iraq û PDKê ve hat çêkirin jî ji hev qutkirina civakê bû. Her wiha bi vî diwarê hat xwestin ku civaka Êzidî tenê bê hêştin. Lê heke wî diwarê niha ne di navbera me de bûna dê şengaliyan bi rûhê ku neteweya demokratîk daye avakirin dê ji bo axa Rojava canê xwe jî feda bikira.”
Hevseroka MXDŞê wiha dawî li axaftina xwe anî: “Em di bin her şert û mercê de bi gelê Bakur û Rojhilatê Sûriyeyê re ne. Ji bo piştgiriya bi wan re çi ji destê me bê em ê bikin.”
