Bi hezaran kesan ji damezrînerên PKKê Alî Haydar Kaytan û Riza Altûn li Qada Şêx Seîd a Amedê bi bîr anîn. Di bîranînê de wiha hate gotin: “Pîrên Kurdistanê nemirin. Em soz didin em ê armanca wan pêk bînin.”
Qadroyên pêşeng ên PKKê Alî Haydar Kaytan û Riza Altûn li Qada Şêx Seîd a Amedê hatin bibîranîn. Malbatên Alî Haydar Kaytan û Riza Altûn, Hevserokê Partiya Herêmên Demokratîk (DBP) Keskîn Bayindir, parlamenterên Partiya Wekhevî û Demokrasiyê ya Gelan (DEM Partî), siyasetmedara Kurd Leyla Zana, rêveberên rêxistinên DEM Partî û DBPê yên navçe û bajarên bakurê Kurdistanê, hevşaredar, nûnerên saziyên sivîl ên civakî û bi hezaran kes beşdarî bîranînê bûn.
Beriya bernameya bîranînê gelek jinên ji bajarên bakurê Kurdistan û Tirkiyeyê hatin li Tek Kapi ya Sûrê kom bûn. Jinên ku pankarta “Weke rênîşandanên daîmî dê di têkoşîna me de bijîn” vekirin, dirûşmên “Şehîd namirin” , “Jin jiyan azadî” , “Jin jiyan azadî, azad bike Rêbertî” , “Jin şer naxwazin aşitiyê dixwazin” berz kirin û ber bi Qada Şêx Seîd ve meşiyan. Bi sedan kesên li derdora qadê kom bûn jî bi berzkirina dirûşmeyan derbasî qadê bûn. Her wiha ciwanan pankarta “Têkoşîna wan rêya me ronî dike” vekirin. Gelek dayik bi laçikên xwe yên kesk û sor û zer ketin qadê. Di qadê de jî dirûşmên “Rêya şehîd rêya me, PKK partiya me” , “PKK gel e, gel li vir e” , “Bijî Serok Apo” berz kirin.
Bîranîn bi 2 deqîqeyan rêzgirtinê dest pê kir. Di bîranînê de Çerxa Şoreşê hate xwendin. Dû re bi hezaran kesan yek dengî dirûşma “Şehîd Namirin” berz kirin.
‘Her windakirina şoreşgerekî gelekî giran e’
Dû re Pîr Zeynel Kete ji bo Gulbangê derket ser dikê û ji bo cangoriyan dûa kir.
Piştre Hevserokê MEBYA-DERa Amedê Mehmet Emîn Kiliç axivî û diyar kir ku ew di kesayeta Alî Haydar Kaytan û Riza Altûn de hemû cangorî bi bîr anîn û wiha got: “Ez ji Qada Şêx Seîd hezar silavan re ji berxwedana zindanan re dişînim. Weke MEBYA-DER spasiyên xwe pêşkeşî hemû sazî, dezgeh û partiyên siyasî yên keda wan di vê bîranînê de derbas bûne dikin. Şehîdên me gelek mezin in. Armanca wan jî gelek hêja û girîng e. Her windakirineke şoreşgerekî an fermandarekî ji me re gelekî mezin û giran e.”
‘Ey Rêberê Gelan em li pişt banga te ne’
Emîn Kiliç bal kişand ser banga Rêberê Gelê Kurd Abdullah Ocalan û wiha berdewam kir: “Ey Rêberê Gelan em banga te qebûl dikin, dipejirînin here em û Xwedê bi te re ne. Em li pişt banga te ne. Em di pêvajoyeke girîng de derbas dibin. Nesamîmîtî dûrûtî xwe didin dest, kesên ku vî destê aştiyê nagirin û vî deriye nagirin em wan şermezar dikin û wan vedixwînin berpirsyariyê. Em soz didin ku em ê armanca şehîdan pêk bînin.”
‘Pîrên Kurdistanê nemir in’
Rêveberê MEBYA-DERa Êlihê Ûgûr Agir axivî. Ûgûr Agir jî bi lêv kir ku hemû cangoriyan bi rêzdarî bi bîr tînin û wiha got: “Pîrên Kurdistanê ji bo gelê xwe cihek nema gav neavêtinê, bêyî rawestan meşiyan. Bi saya rêya wan a li Kurdistanê vekirin em dikarin bijîn. Em ê di jiyana xwe de wan her tim bi bîr bînin. Pîrên Kurdistanê nemir in. Şehîd namir in.”
Çerax hatin pêxistin û peyama Abdullah Ocalan hate xwendin
Dû re çerax hatin pêxistin. Di dema pêxistina çeraxan de dirûşma “Şehîd namirin” hate berzkirin. Piştre parlamentera DEM Partiyê ya Mêrdînê peyama Rêberê Gelê Kurd Abdullah Ocalan ji bo Kaytan û Altûn nivîsandibû xwend. Piştî peyamê girseyê dirûşma “Bijî Serok Apo” berz kir.
‘Divê dewlet gavan biavêje’
Parlamentera Wanê Gulcan Kaçmaz Sayyîgît li ser navê Yekitiya Înîsiyatîfa Demokratîk axivî. Gulcan Kaçma Sayyîgît diyar kir ku bi salan jî biaxivin tê ra bîranîna cangoriyan nake û di kesayeta Alî Haydar Kaytan û Riza Altûn de hemû cangorî bi bîr anîn. Gulcan Kaçmaz Sayyîgît wiha got: “Heke em bi nasnameya xwe bikarin siyasetê bimeşînin saya cangoriyan e. Beriya sed salan li vir Şêx Seîd hate qetilkirin lê nêviyên Şêx Seîd têkoşîna xwe didomînin. Sed sal in em tên tunekirin lê dîsa em dibêjin aştî, azadî û wekhevî. Rêberê Gelê Kurd Birêz Ocalan bangek kir, em hemû berpirsyar in. Divê em berpirsyartiya xwe bi cih bînin û dewlet jî gavan biavêje. Em ê ji bo aştî û yekitiyê xebatên xwe bidomînin. Divê em li her derê bixebitin. Rêya me rêya aştî, wekhevî û azadiyê ye. Em rêwiyên heqîqetê ne. Oxir be rêwiyên heqîqetê.”
Dû re pêşkeşvan Ferhat Ertaş helbesta Alî Haydar Kaytan a bi navê “Akiş Sevincî” xwend.
Paşê endamê Komeleyên Elewiyên Demokratîk (DAD) Hasan Ekîcî ji bo bîranîna Kaytan û Altûn li tembûrê da û stran gotin. Bîranîn bi belavkirina helawa Gulbangê bi dawî bû.
Malbatên Alî Haydar Kaytan û Riza Altûn derbasî avahiya DEM Partiyê ya Amedê bûn û li vir beşdarî serdanên sersaxiyê bûn.
