Mîhrîcana Fîlman a Jinan a Nûjiyan dê sibê dest pê dike. Di mîhrîcanê de li gel fîlm û belgefîlman dê komxebat û semîner jî li dar bikevin.
Di 25ê Gulanê de, Mîhrîcana Fîlman a Jinan a Nûjiyan a ku ji aliyê Kollektîfa Kezî ya Jinên Sînemager ve bi piştgiriya SîneJin a Rojava, Tevgera Çanda Jinên Hîlala Zêrîn, sînemagerên jin ên li Ewropayê û bi alîkariya Desteya Çandê ya Kantona Cizîrê hatiye birêxistinkirin, dest pê dike. Mîhrîcan li Navenda Mihemed Şêxo ya Çand û Hunerê û Baxçeyê Azadî yên li Qamişlo di navbera 25-31ê Gulanê de bi pêşandana 37 fîlm û belgefîlmên ji Kurdistanê, Rojhilata Navîn, Amerîka, Ermenistan û Ewropayê dê bidome. Mîhrîcan li ser navê rojnamevan Nûjiyan Erhan e ku di 3yê Adara 2017an de di encama êrişa çekdarên PDKê ya li Xanesora Şengalê de şehîd bûbû.
Têkildarî sedema binavkirina mîhrîcanê Endama Komîteya Amadekar a Mîhrîcanê Çîdem Roj ji ANHAyê re axivî û diyar kir ku wan ji bo bîranîna şehîd Nûjiyan ev gav avêtiye, dixwazin rola wê ya pêşeng di jiyan û têkoşînê de derxin pêş. Di mîhrîcanê de li ser navê nûçegihana ajansa ANHAyê Cîhan Bîlgîn ku di 19ê Kanûna 2024an de dema berxwedana şervanan a li dijî êrîşand dişopandin, di êrişeke hewayî ya Tirk de jiyana xwe ji dest da pêşangeheke wêneyan tê vekirin. Di pêşangehê de dê nêzî 40 wêneyên ku rojnamevanên jin ên li Kurdistanê û derveyî welat û yên Cîhan Bîlgîn bên pêşandan.
Mîhrîcan sibê (25 Gulan) saet di 20:00an de bi pêşandana fîlmekê li Baxçeyê Azadî yê li Qamişlo dest pê dike. Piraniya filmên ku bên pêşandan ji aliyê jinan ve hatine çêkirin, di nava wan de dê fîlmên ku cara yekemîn bên pêşandan jî hene. Li kêleka fîlman dê komxebat û semîner jî bên lidarxistin.
Bernameya mîhrîcanê:
https://hawarnews.com/kr/mihricana-filman-a-nujiyan-di-25-31e-gulane-de-li-dar-dikeve
