Welatiyê bi navê Mehmet Yildirim ku leşkeran di Gulana 2024an de li gundê Nenyasê yê navçeya Licê ew kuştibûn li ser gora xwe hate bibîranîn.
Leşkerên Tirk di 24ê gulana 2024an de li gundê Nenyasê yê ser bi navçeya Licê ya Amedê ve derketibûn operasyonê. Leşkeran li gundê Nenyasê welatiyê bi navê Mehmet Yildirim (Sofî) ê 45 salî ku bavê 4 zarokan bû kuştibûn. Malbata Mehmet Yildirim bi boneya salvegera kuştina wî li mala xwe û mala şînê ya gund mewlud dan û ew li ser gora wî ya li gund bi bîr anî.
Meş hat lidarxistin
Endam û rêveberên Komelya Yekitî, Çand Alîkarî û Piştevaniyê ya bi Malbatên Xizmên Xwe li Dêrgûşa Şaristaniyê Windakirine re (MEBYA-DER) û Partiya Wekhevî û Demokrasiyê ya Gelan (DEM Partî) û gelek welatî tev li merasîma bîranînê bûn. Ewilî li mala Mehmet Yildirim û mala şînê ya gund mewlud hate xwendin. Piştî mewludê girse ji mala Mehmet Yildirim heta goristana gund meşiyan. Di meşê de wêneyê Mehmet Yildirim hate hilgirtin. Girseyê di meşê de dirûşma “Şehîd Namirin” berz kir.
‘Wê Mehemed tu caran neqedin’
Di bîranîna ku bi rêzgirtinê dest pê kiri de ewilî nûnerê MEBYA-DERê yê Licê Halîs Aksakal axivî. Halîs Aksakal di kesayeta Mehmet Yildirim de hemû cangoriyên Kurdistanê bi bîr anîn.
Dû re bavê Mehmet Yildirim, Yemlîhan Yildirim axivî û destnîşan kir ku wê Mehemed tu caran neqedin.
Pişt re keça Mehmet Yildirim, Zehra Yildirim helbesta bi navê “Ez Sofî me“ ku xalê wê ji bo bavê wê nivîsî ye xwend.
Xwarzê û biraziyê Yildirim di bîranînê de gul û çîçek danîn ser gorê û bîranîn bi dawî bû.
