Navenda Nûçeyan – Li gorî daneyên SOHRê di 24 saetên dawî de li Sûriyeyê 8 kes hatine kuştin. Di 10 rojên dawî de herî kêm 54 mirov hatin kuştin. Piştî Şam ket kontrola HTŞê êrîşên DAIŞê yên li dijî Bakur û Rojhilatê Sûriyê zêde bûn. Ji destpêka 2025an heta niha DAIŞê 86 çaran li Bakur û Rojhilatê Sûriyê êrîş pêk anîn.
Navenda Çavdêriya Mafên Mirovan a Sûriyeyê (SOHR) da zanîn ku li deverên cuda yên Sûriyeyê di nava 24 saetên dawîn de 8 kes hatine kuştin. Ji 14ê Gulanê heta niha 54 mirov hatin kuştin. SOHRê ku der barê kuştina 8 kesan agahî parve kirin û diyar kir ku li gundewarê Tertûsê di 3 bûyerên cuda de 3 kes ji aliyê komên çekdar ve hatin qetilkirin. Hate diyarkirin ku bûyer li Pira Xerîbat, gundê Mecdelûn û rêya Beyt Elyan rû dan. Li herêma Dimêr a gundewarê Şamê jî 2 endamên “Firqeya 54an- Tîma Endazyariyê” ya girêdayî desthilata Şamê dema mayîn bê bandor dikirin jiyana xwe ji dest da û hin din jî birîndar bûn.
Her wiha hate diyarkirin ku li herêma Meza Besatîn a Şamê çekdarên nenas kesek bi tawana ku bi rêjîma berê re didan û distandin, kuşt. Li gorî SOHRê, rojnamevanek ku beriya du hefteyan li Şamê winda bibû, cenazeyê wî li nêzî bajarokê Ceyrûd ê Qelemûnê di nava kavilan de hat dîtin. Li nêzî Nexweşxaneya Almanî ya li herêma Kiswa ya gundewarê Şamê jî şerekî çekdarî derketibû. Endamekî hêzên ewlekariyê ya desthilata Şamê dema navbeynkariyê bike û dawî li pevçûnê bîne, hat kuştin.
Di 23ê Gulanê de 8 kes hatin kuştin,
Di 21ê Gulanê de 10 kes hatin kuştin.
Di 19ê Gulanê de 12 kes hatin kuştin.
Di 14ê Gulanê de 16 kes hatin kuştin.
Piştî HTŞê êrîşên DAIŞê zêde bûn.
Bi taybetî piştî Şam ket kontrola HTŞê êrîşên DAIŞê yên li herêmê zêde bûn. Ji çileya 2025an heta nhia DAIŞê li herêma ku di kontorla HSDê de ye 86 êrîş pêk anîn. DAIŞê ji serê Gulanê heta niha 14 êrîş pêk anîn. Ev dane nîşan didin ku DAIŞ xwe ji nûve zindî dike û êrîşên xwe yên li herêmê zêde kirine. Êrîşên DAIŞê ewlehiya herêmê tixe talûkeyê û rê li pêşiya kaos û aloziyên nû vedike. DAIŞ bi taybetî êrîşên xwe yên li herêma El-Baxoz û Deyr ez Zorê zêde dike. Di êrîşên DAIŞê yên li herêma HSDê de 2 şervanên HSDê jiyana xwe ji dest dan.
Di 10 rojan de 49 kes darve kirin
Li Sûriye di 10 rojên dawî de li herêmên cûda 49 kes hatin darvekirin. Di 10 rojên ewil ên meha Gulanê rêjeya kesên tên darvekirin zêde bû. Di 10 rojan de 49 kes hatin darvekirin. Di nava van kesan de şervan, mirovên sivîl û kesên ji nasname û baweriyên cuda jî hene. Li gorî daneyên SOHRê li Helebê 5 kes, li Lazkiyeyê 2 jê zarok bi giştî 11 kes, li Hamayê 13, li Derayê 1 kes, li Humusê 12 kes, li Rif Şamê 3 kes, li Deyr ez Zorê 1 kes, li Tartusê 1 kes, li Şamê 2 kes, bi giştî di 10 rojên meha Gulanê de 49 kes hatin darvekirin.
