Li gorî amarên tundûtûjiyê yên meha Gulanê ya JINNEWSê, 21 jin hatine kuştin, 19 jin û 3 zarok di bin şert û mercên gumanbar de kuştî hatine dîtin. Platforma Em ê Cînayetên Jinan Rawestînin jî aşkere kir ku 21 jin hatine kuştin û 20 jin jî bi guman mirine.
Li gelek bajarên Bakurê Kurdistan û Tirkiyeyê, şîdeta mêran hîn jî dibe sedema mirina jin û zarokan. Her çend saziyên fermî daneyên li ser jinên ku hatine kuştin bi awayekî zelal parve nakin jî, nûçe û daneyên sînorkirî yên di çapemeniyê de bi tevahî wêneyê heyî nîşan nadin. Jin di nav kêmbûna daneyan ji hêla dewletê ve, gotinên hikûmetê yên ku şîdeta mêran rewa dikin û polîtîkayên bêcezatiyê yên dadweriyê de, parastina mafê xwe yê jiyanê didomînin. Li gorî daneyên ku JINNEWSê ji nûçeyên di çapemeniyê de berhev kiriye, di meha Gulanê de 21 jin hatine kuştin û 19 jin û 3 zarok di bin şert û mercên gumanbar de mirî hatine dîtin.
Platforma Em ê Cînayetên Jinan Rawestînin: Mêran 21 jin kuştin
Li gorî rapor û daneyên Platforma Em ê Cînayetên Jinan Rawestînin jî di gulana îsal de 21 jin bi destê mêr hatin kuştin û 20 jin jî bi guman kuştî hatin dîtin.
