SOHRê daxuyand ku li Sûriyeyê di 24 saetan de 9 kes hatin kuştin û kesek birîndar bû.
Navenda Çavdêriya Mafên Mirovan a Sûriyeyê (SOHR) ragihand ku di 24 saetan de li Sûriyeyê 9 kes hatin kuştin û kesek birîndar bû.
Li Derayê cenazeyên 2 ciwanên ji gundên Koya û Bêt Are yên herêma Yermûk a gundewarê Derayê hatin dîtin. Diyar bibû ku ew bi guleyan ji aliyê komeke çekdar ve li gundê Cilîn ê rojavayê Derayê hatine qetilkirin. Kujer nehatine naskirin.
Li Laziqiyê jî 2 ciwan, ji wan yekî xwediyê pêdiviyên taybet hatin qetilkirin. Cenazeyê ciwanekî din jî yê ji gundê Betmûş hat dîtin ku bi guleyan hatiye qetilkirin. Ciwan di dema biserdegirtina hêzên desthilata Şamê ya li gundê Bêt Ana û Daliye yên gundewarê Ceblê de hatiye qetilkirin. Di wê biserdegirtinê de hêzên desthilata Şamê bi dehan mal, dibistan, navendeke bazirganiyê û navendeke werzîşê şewitandin.
Li Himsê di encama pevçûna çekdarî ya 2 malbatan de li gundê Mehîn ê rojhilatê Himsê, kesek hat kuştin.
Li taxa Wadî El Deheb jî ciwanekî ku hêzên desthilata Şamê berî çend rojan ew revandibû, di bin êşkenceyê de hat qetilkirin.
Ciwanê bi navê Yûsif El Tewîl ê ji gundê Barûha yê herêma Telkelex a rojavayê Himsê ku berî çend rojan ji aliyê hêzên desthilata Şamê ve hatibû binçavkirin, wefat kir.
Di encama teqîna bermahiyên şer de li herêma Cezel El Setih El Ebyed a gundewarê Himsê welatiyek birîndar bû û ji bo nexweşxaneyê hat birin.
Li Derayê welatiyekî li bajarê Senemên ê bakurê Derayê ku bi şaştî gule ji çekê xwe barandibû, xwe kuşt.
Li hemberî têkçûna rewşa mirovî û zêdebûna tundiyê li Sûriyeyê, civata navnetewetî di bêdengiya xwe de didome.
