Platforma Têkoşîna li Dijî Hişbirê ya Şiyar Be li dijî bikaranîna hişbirê ji Qada Şêx Seîd heta Deriyê Mêrdînê yê navçeya Sûrê meşiya û belavok belavkirin.
Platforma Têkoşîna li Dijî Hişbirê ya Şiyar Be li dijî bikaranîna hişbirê ji Qada Şêx Seîd heta Deriyê Mêrdînê yê navçeya Sûrê meşiya û belavok belavkirin. Hevberdevka HDKê Meral Daniş Beştaş di nav de gelek endam û rêveberên partiyên siyasî, saziyên sivîl ên civakî, hevşaredar û ciwan tev li meşê bûn. Di meşe de dirûşmên “Amed neraze xwedî li ciwanên xwe derkeve”, “Kurdistan goristan ji bo faşîstan”, “Bijî berxwedana ciwanan” û“Şiyar Be ne jehrê heviyê hembêz bike” hatin berzkirin û ciwanan stîkirên ku bi Kurdî û Tirkî li ser nivîsên “Tiryak ne baş e, tu baş î” û “Azadî xweş e xwe azad ke” bi stûnên li ser cadeyan û bi dîwaran ve kirin. Girseyê di meşê de her tim lîlandin û broşurên ku nivîsên “Şiyar be” , “Azad be” , “Aram be” û “Ava ke” li ser dinivîsîn belav kirin. Welatiyan jî bi çepikan piştgirî dan girseyê. Dû re girse gihişt Deriyê Mêrdînê û li wir axaftin hatin kir.
Hişbir pirsgirêkeke civakî ya esasî ye
Hevberdevkê Platformê Mûrat Kan ê ewilî li vir axivî diyar kir ku hişbir pirsgirêkeke civakî ya esasî ye û da zanîn ku ji bo hişyariya civakê dê meş û çalakiyên xwe yên bi vî şiklî bidomînin. Mûrat Kan diyar kir ku roja Şemiyê saet di 17.30an de dê ji Xaçerêya Dunyayê ya li navçeya Peyas Amedê heta Parka Rojava meşekê li dar bixin.
Platform karekî girîng dike
Meral Daniş Beştaş jî bi lêv kir ku ji ber pirsgirêkeke civakî ya herî mezin berbiçav dike karekî girîng dike û wiha got: “Divê hemû civak, kes piştevaniya civakê bikin û piştgiriyê bidinê. Ji bo vê jî rêxistinkirina civakî hewce ye. Ev meseleyeke polîtîk e. Dema mirov têkoşîna civakeke bitendurist dimeşîne divê tenduristiya civakê jî bifikire.”
‘Heke em şiyar bibin em dikarin azad bibin’
Meral Daniş Beştaş bal kişand ser belavoka ku platformê belav kir û wiha got: “Di belavokê de dibêje ‘Şiyar be’. Em jî ji civakê re dibêjin şiyar be. Heke em şiyar bibin em dikarin azad bibin. Divê em azadiya xwe bigirin destê xwe. Ji bona vê jî em ê bibêjin aram be, ava bike. Divê em civaka xwe ji serî ve ava bikin. Di vî warî de bila herkes ji cîran, malbat, heval û zarokên xwe re platformê bide nasîn û em bi hev re serbikevin.”
Meş piştî axaftin hatin kirin bi dawî bû.
