Hevserokê Tevgera Civaka Demokratîk (TEV-DEM) a Kantona Firatê Enwer Muslim, têkildarî êrîşen li ser Rojava û siberoja Sûriyeyê nirxandin kir û got: “Komên ku navê Ceyş El Watanî li xwe dikin Dewheta Tirk piştgiriya wan dike. Ev kom bi destê Tirkiyeyê êrîşî Qereqozax û Bendava Tişrînê dikin.”
Di 27ê Mijdarê de HTŞê li dijî Heleb û gundên wê dest bi êrîşan kir. Di çar rojan de Heleb xist kontrola xwe. Piştre bajarên Hamma Hems û herî dawî di 8ê Kanûnê de jî Şam dagir kir û Hikûmeta Baasê hilweşand. Di vê pêvajoya ku HŞTê dest bi êrîşan û kontrolkirina bajarên Sûriyeyê kir de, komên çete yên wekî Ceyş El Vatanî, Artêşa Sultan Murad, ANS-OSO û gelek komên din ku xwe dispêrin Tirkiyeyê li dijî Şehba, Til Rifat, Minbic, Tebqa, Qereqozax û Bendava Tişrîne kirin. Di deh rojan de bi dehan êrîşên hewayî pêk anîn. Di van êrîşên komên çeteyan de bi dehan welatiyên sivîl hatin kuştin. Gelek zarok hatin kuştin. Lê welatên cîhanê ev rewş temaşe kir. Têkildarî van geşedanên ku li herêmê pêş dikevin Hevserokê Tevgera Civaka Demokratîk (TEV-DEM) a Kantona Firatê Enwer Muslim ji Ajansa Welat (AW) re axivî.
Dê li ser axa Sûrî guhertin pêk bê
Enwer Muslim anî ziman ku piştî Heyet Tahrîrî Şam (HTŞ) berê xwe da Helebê û rejîma Sûriyê hilweşiya, Beşer Esad reviya Surî ber bi konaxake nû ve diçe û wiha got: “Niha li Sûriyê rola Rûsan pir lewaz bû. Rola Îran û rejîmê nema. Ji ber vê guhertinekê li ser axa Sûriyê dê pêk bê. Niha HTŞ wek hukumeteke demkî li Şamê hatî avakirin. Ji hemû pêkhateyên Sûriyê pêk nayê. Tenê ji aliyekî (hêzekê) pêk tê. Lê tê gotin ku ev hikumet demkî ye. Heta sê mehan hukumeteke ku ji hemû pêkhateyên Sûriyê pêk tê dê bê avakirin.”
Komên vatanî bi destê Tirkiyeyê êrîş dikin
Enwer Muslim da zanîn ku niha hinek komên leşkerî ku navê Leşkerên Wetanî li xwe dikin û Dewleta Tirk piştgiriya wan dike û wiha axivî: “Ev komên vatanî bi destê Tirkiyeyê êrişî Bakûr û Rojhilatê Sûriyê dikin. Êrişî deverên wek Qereqozax û Bendava Tişrînê dikin. Diyar e hê şer li tevahî Sûriyeyê nehatiye rawestandin. Çareseriyek pêş neketiye. Ji ber vê yekê jî divê civaka navneteweyî, saziyên mafê mirovan û civakên Neteweyên Yekbûyî (NY) rista xwe bi lez bilîzin. Ji bo li tevahî axa Sûriyê şer bisekine, divê çareseriya siyasî pêk bê.”
Em ji bo yekîtiya Sûrî têdikoşin
Enwer Muslim bal kişand ser têkoşîna Rêveberiya Xweser û rêxistinên civakî yên Bakur û Rojhilatê Sûrî û wiha pêde çû: “Niha Rêveberiya Xweser jî di vê mijarê de gelek caran daxûyanî da. Bername amade kir. Em ji bo yekitiya Sûriyê têdikoşin. Ev ala niha ku ji bo Sûriyê hatiye amadekirin em jî wê alê qebûl dikin. Ya din jî niha diyalog di navbera gelên Rojhilat û Bakûrê Sûriyê de heye. Xebat tên meşandin ku şandeyek bê avakirin. Ji bo ku yek şande biçe Şamê û bibe muxatab bi mafê pêkhateyên Bakûr û Rojhilatê Sûriyê re eleqedar bibe. Lê heta niha tu daxûyaniyeke resmî di vî warî de tuneye. Lê danûstendin diyalog hene. Hevdîtinên koalîsyonê jî bi hêzên siyasî, civakî bi hemû aliyan re hene ji bo ku Sûriyeke demokratîk bê avakirin. Niha em wek Kurd, Tirk, Ereb li Rojhilata Navîn bi hev re dijîn. Divê yekemîn karê me pêkanîna aşitiyê be, em li ser vê bixebitin. Divê Tirkiye bibe alîkar ku hemû beşên Sûriyê tevî rêveberiyê bibin.”
Divê êdî em bi diyalogê çareser bikin
Hevserokê TEV-DEMê yê Kantona Firatê Enwer Muslim herî dawî bal kişand ser rêbaza çareseriyê û wiha bi dawî kir: “Divê êdî em rê li pêşiya aloziyan bigirin. Miletê Sûriyê 12 salin di nav şer de ye. Koçber e. Divê êdî her kes ji aliyê xwe ve ji bo ku ev şera biqede çi ji destê wan tê bikin. Em van pirsgirêkên heyî bi diyalogê çareser bikin. Ev miletê me yê ku li Efrînê, Serêkaniyê, Girê Spî, li deverên din derketiye; Kurd dibe, Ereb dibe kî dibe bila bibe, divê êdî vegere malên xwe, ser axa xwe. Vêya jî encax bi diyalogê çareser dibe. Ji ber wê jî em li bendêne ku her alî vê meselê ji xwe re bike meseleyeke esas. Ji xwe ev sê roj in jî li deverên wek Qerekozax û Tişrînê agirbest hatiye ragihandin. Em hêvîdar in ev jî bibe bingeh ji bo ku pirsgirêkên heyî çareser bibin. Tiştên ku Rêveberiya xweser dixwaze ne tiştên zêde xerîbin. Em wekhevî, demokrasiyê dixwazin. Em dixwazin gelên ku li ser axa Sûriyê dijîn bi awayekî demokratîk bijîn. Divê hemû gelên Sûriyê xedî biryar bin. Divê li Şamê vîn û nûnertiya hemû gelan di derheqê jiyan aborî, xizmetguzarî, siyasî de hebe. Peyamên Rêveberiya Xweser ev in, em alîgîrê aşitiyê ne. Em piştgiriya Sûriyeke wekhev, demokrat, dewleteke xwedî qanûn ku mafê hemû gelan diparêze dikin. ji bo vê dixebitin.”
