Platforma Têkoşîna li Dijî Hişbirê ya Şiyar Be li dijî bikaranîna hişbirê ji Xaçerêya Dunyayê heta Parka Rojava meşiya. Nûnerên partiyên siyasî û saziyan ên li vir axivîn, destnîşan kirin ku heta hişbirê ji ser vê axê biqedînin dê têbikoşin û diyar kirin ku divê li dijî hişbirê tedbîran bigirin.
Platforma Têkoşîna li Dijî Hişbirê ya Şiyar Be li dijî bikaranîna hişbirê û fihûşê ji bi dirûşma “Em civakê biparêzin” ji Xaçerêya Dunyayê heta Parka Rojava ya navçeya Peyasa Amedê meşiya. Gelek endam û rêveberên partiyên siyasî û saziyên sivîl ên civakî, parlamenter, hevşaredar û ciwan tev li meşê bûn. Di meşê de pankartên “Ne jehrê kedê hembêz bike” û “Li dijî tiryakê bibe barikat” hatin hilgirtin û dirûşmên “Amed ranezê xwedî li ciwanên xwe derkeve”, “Li dijî tiryakê mil bidin milê hev”, “Bijî berxwedana ciwanan” û “Şiyar be ne jehrê hêviyê hembêz bike” hatin berzkirin. Gelek kesan pêşmalkên li ser “Şiyar be” dinivîsî li xwe kirin. Girseya di tevahiya meşê de dirûşm berz kir û li çepikan da meşa xwe li Parka Rojava bi dawî kir.
‘Hişbir we dikuje jê dûr bikevin’
Li vir ewilî Serokê Baroya Amedê Abdûlkadîr Guleç axivî. Abdûlkadîr Guleç diyar kir ku ew li dijî polîtîkayên ku civakê ji nirxên exlaqî û etîk dûr dixin li vir in û wiha got: “Têkoşîna li dijî tiryakê tenê bi têkoşîna gel û saziyên sivîl ên civakî nameşe. Em bang li meqamên cemaweriyê û rêveberiyên herêmî dikin. Heke bi rastî em bixwazin li dijî vê pergala ku gelê Kurd ji nasname, nirxên siyasî û avaniya rêxistinî dûr dixe têbikoşin divê em li her qada jiyanê tedbîran bigirin. Hişbir di 7-8 salên dawî de gelek tê bikaranîn û her ku diçe belav dibe. Ji ber vê yekê berpirsyartiya me û meqamên cemaweriyê heye. Em ji vir ewilî bang li dewletê dikin. Em weke civak amade ne ku li dijî vê têbikoşin. Divê hûn jî tevkariyê li têkoşîna me bikin. Em bang li ciwanan jî dikim. Ji belaya hişbirê ku pêşeroja we reş dike, hêviya we diqedîne û we dikuje dûr bikevin. Bêtir xwe bi rêxistin bikin, têbikoşin û hêviyê hembêz bikin.”
‘Em xwedî li pêşeroja xwe derkevin’
Dû re li ser navê Federasyona Komeleyên Herêmî Zahît Çîftkûran axivî. Zahît Çîftkûran bang li dayik û bavan kir ku xwedî li zarokên xwe derkevin û wiha got: “Dayikno, bavno zarokên me li ber çavên me dihelin diçin. Ciwan û zarokên me pêşeroja me ne. Em xwedî li pêşeroja xwe derkevin.”
‘Em amade ne ku li dijî hişbirê bibin seferber’
Herî dawî jî parlamentera DEM Partiyê ya Amedê Ceylan Akça axivî û wiha got: “Banga Aştî û Civaka Demokratîk ji bo çareserkirina belaya hişbirê ya ji axa Kurdistanê dest pê dike û belavî cihên din dibe jî heye. Em armanc dikin ku civaka exlaqî ava bikin. Ji bo ku ji bengîtiyê ji amûra vî şerî xelas bibin em amade ne ku ji bo bibin seferber. Heta ku em hişbirê ji ser vê axê biqedînin em ê têbikoşin.”
Daxuyanî bi lêdana çepikan bi dawî bû.
