Amed – Jinên ku tev li Konferansa Platforma Yekîtiya Jinên Kurd a li Amedê hate lidarxistin bûn diyar kirin ku heke demokrasî neyê welat aştiyeke birûmet pêk nayê û destnîşan kirin ku ji bo pêvajo bi azadiya jinan tacîdar bibe divê jin xwe bi rêxistin bikin.
3yemîn Konferansa Platforma Yekîtiya Jinên Kurd bi dirûşma “Bi Yekîtiya Jinên Kurd Ber bi Yekîtiya Neteweyî ve” di 21 û 22yê Hezîranê de li Eywana Odeya Bazirganî û Pîşesaziyê ya Amedê (DTSO) hate lidarxistin. Parlamenter, hevşaredar, nûnerên partiyên siyasî û saziyên sivîl ên civakî di nav de ji bakurê Kurdistan û Tirkiyeyê gelek jin beşdarî konferansê bûn. Konferans bi eşkerekirina encamnameyê di roja duyemîn de bi dawî bû. Jinan di encamnameyê de wiha gotin: “Yekitiya neteweyî, têkoşîna çand û zimên, parastina jiyana azad û pêşengtiya jinan a di avakirina aştiyê de hîmên bingehîn yên vê serdemê ne. Jin dê di avakirina civaka demokratîk de bi roleke sereke rabin.”
‘Jin bi xebatên xwe dibêjin em hene’
Yek ji jinên ku tev li konferansê bû jî endama Înîsiyatîfa Yekîtiya Demokratîk Dîba Ermîş Keskîn diyar kir ku konferans ji bo jinan pîroz e û wiha got: “Jin bi hezaran salan ji aliyê olan, civakan hişmendiye mêran ve hatiye binpêkirin, ji kesayeta xwe hatiye dûrxistin, di nava jiyanê de weke amûrekê hatiye bikaranîn. Jin bi xebatên xwe û bi vê konferansê dibêjin em jî hene. Helbet ji bo me jinan xebateke pîroz e, bi qedir e û em hemû jî gelek kêfxweş in.”
‘Jinên Kurd ji bo tevahiya Rojhilata Navîn têdikoşin’
Dîba Ermîş Keskîn bi lêv kir ku heke demokrasî neyê welat aştiyeke birûmet pêk nayê û wiha domand: “Demokrasî neye vî welatî dê li herêmekê birçîbûn, li herêmekê tehdayî hebe. Ji ber vê yekê divê aştî û aramî were Rojhilata Navîn. Jinên Kurd ne tenê ji bo xwe ji bo tevahiya Rojhilata Navîn têkoşîna demokrasiyê, pêşketinê û hebûnê didin.”
Rol û mîsyona jinan a pêvajoyê nîqaş kirin e
Hevşaredara Êlihê Gulistan Sonuk a qeyûm tayînî şûna wê hatiye kirin jî qala konferansên platformê yên beriya niha hatine lidarxistin kir û wiha got: “Di pêvajoyeke wisa girîng û dîrokî de weke jinên Kurd me berpirsyartiyek girt ser milê xwe ku em ê bikaribin piştgiriyeke çawa bidin vê pêvajoyê. An jî dê di vê pêvajoyê de rol û mîsyona jinan çi be? Me xwest em hinekê vê bi hev re nîqaş bikin. Ji ber vê yekê ev konferans hate lidarxistin. Em vê baş dizanin heke yekîtî çêbibe azadiya gelê Kurd misoger bibe dê di pêşengtiya jinan de çêbibe. Bi rastî ji ber mijarên hatin nîqaşkirin û kargehên hatin kirin konferanseke pir têr û tejî bû û girîng bû. Ne tenê ji partiyekê an ji tevgerekê gelek pêkhateyên partiyên siyasî û saziyên demokratîk ên li Bakûr tev li konferansê bûn. Aştî û civaka demokratîk ne tene karê aliyekê an partiyekê ye. Pir bi qiyemete ku ev konferans di pêvajoyeke wiha de were lidarxistin.”
‘Jin û xebat dikarin pêvajoyê bi leztir bikin’
Gulistan Sonuk di berdewama axaftina xwe de wiha got: “Aştî civakbûyîne, jin jî civakbûyîn e. Ji ber vê yekê mirov nikare jin û aştiyê ji hev qût bigire dest. An jî mirov nikare mayîndebûna aştiyeke ku jinan paşguh dike bike. Ew aştî civakî nabe. Tiştê ku ne civakî be mayînde jî nabe. Ji ber vê yekê roleke pir girîng dikeve ser milê jinan. Ji ber ku têkiliyê jinan bi civakê re qût nebûye. Ji ber vê yekê di avakirina aştî û civaka demokratîk de jî rol û mîsyoneke wê ya girîng heye. Heke em îro behsa civaka demokratîk bikin divê em ewilî têkiliyên di nav jin û mêran de demokratîk bikin. Dema têkiliya di nava jin û mêran de demokratîk nebe mirov nikare behsa demokrasiyekê bike. Jin çiqas di nava kar û xebatên aştiyê de cihbigire dê pêvajo bi awayekî lez bi pêş bikeve û aştî dê mayîndetir bibe.”
‘Divê jin xwe li her derê bi rêxistin bikin’
Gulistan Sonuk bal kişand ser banga Rêberê Gelê Kurd Abdullah Ocalan û wiha pê de çû: “Bangawaziya rêzdar Abdullah Ocalan civakî ye. Ev pêvajo dê çawa berdewam bike hinek li ser me jî maye. Em ji bo xwe jinan jî dibêjin ku em bixwazin ev pêvajo bi azadiya jinê tacîdar bibe, divê em xwe bi rêxistin bikin. Ji bo ku ev pêvajo bi rêk û pêk bimeşe û bi azadiya jinê tacîdar bibe divê em li her derê xwe bi rêxistin bikin.
