Rêveberiya Xweser a Kantona Firatê diyar kir ku gefên mezin ên Tirkiyeyê li ser Kobanê heye û bang li tevahiya gel û hemû hêzên azadîxwaz ên cîhanî kir ku bi hevre rûmeta mirovahiyê li Kobanê biparêzin.
Rêveberiya Xweseriya Demokratîk a Kantona Firatê der barê êrîş û metirsiyên Tirkiyeyê yên li dijî Kobanê û tevahiya herêmê daxuyaniyek da. Li Qada Jina Azad bi beşdariya rêveber û endamên saziyên rêveberiya xweser, partiyên siyasî û rêxistinên civakî daxuyanî dan. Hevserokê Fakulteya Ziman û Wêjeya Kurdî ya Zanîngeha Kobanê Mamoste Egîn Nasiro bi Kurdî, Endama Komîteya Pêwendiyan a PYDê Leyla Ehmed jî bi zimanê Erebî daxuyanî xwend.
Li pêş çavê cîhanê jin û zarok tên kuştin
Mamoste Egîn Nasiro diyar kir ku ew her kêlî amade ne ku ji bo çareseriya mayinde ya hemû pirsgirêken Suriyeyê bi riya diyalogê kar bikin da ku hemû gelên li Suriyeyê jiyan dikin bikarin bi awayekî azad û aram bi hevre bijîn û wiha got: “Wek Rêveberîya Xweser a Kantona Firatê, parti û saziyên rêveberîya xweser dibêjin ji bo her cure çareseriyê em amade ne. Di wan çend rojên dawiyê de erîşen berfireh ên li ser axa Suriye, Bakûr û Rojhilatê Suriyeyê bênavber didomin. Bi taybetî li dijî gelê me yê li Şehba û Minbicê bi alikariya dewleta Tirk a dagirker êrişên dijmirovî pêk hatin. Gelek jin, zarok û pir-kal hatin qetilkirin. Bê guman ev êriş li ber çavên hemû cihanê pêk hatin. Gelek dimenên bi êş derketin pêş. Serjêkirin, însan şewitandin, îşkencekirin û her cure kiryarên dijmirovi pêk hatin.”
Egîn Nasiro anî ziman ku li dijî wan êrîşên dermirovî, şervanên HSD, YPJ û meclisên leşkerî bersivên tund dan dagirkeran, berxwedanek bêhempa nîşan dan û wiha axivî: “Gelek şervanên me bi qehremanî şehîd ketin. Dewleta Tirk a dagirker bi rêya balafiran û her cure teknikê destê xwe li pişta çeteyên xwe xist û bi awayekî hovane berê wan dan ser gelên herêmê. Li Şehba, Minbic, Eyn Îsa û gundewarên Kobanê komkujî çêkirin. Armanca dewleta Tirk a dagirker tunekirina gelên herêmê ye, dagirkirina Rojavayê Kurdistnanê ye. Ev xeyala dewleta Tirk a qirker e. Bi taybetî ne tehmulkirina dagirkeran a ji bo rêveberiya xweser, bi salane di rojeva dewleta Tirk a dagirkerde ye.”
Egîn Nasiro da zanîn ku di 19yê Tirmehê de şoreşa gelan li Kobanê dest pê kir û wiha berdewam kir: “êrişa çeteyên DAIŞê yên li ser Kobanê li vir hatin şikandin û vê yê ziravê Erdoxanê faşîst qetand. Lewma di her gotinê de tehditên ser Kobanê di rojeva dagirkerande ye. Kobanê bûye sitriya çavên wan. Di van kêliyan de tehdît û metirsiyek mezin li ser Kobanê heye. Lê em dibêjin bila raya giştî zanibe ku çeteyên DAIŞê li Kobanê bi destê şervanan hate tunekirin û mirovahiyê henase girt, lewma cîhan deyndarê şervan û gelê Kobanê ye. Dem dema xwedî derketina li Kobanê ye.”
Egîn Nasiro herî dawî bang li hemû gelên cîhanê kir û wiha got: “Em bang li gelê xwe û raya giştî ya demokrat, azadîxwaz, koalîsyona navnetewî û hemû mirovahiyê dikin ku werin em bi hevre rûmeta mirovahiyê li Kobanê biparêzin.”
Daxuyanî bi dirûşmeya “Berxwedan jiyan e” bi dawî bû.
