Civînên gel ên ku li Amedê hatine destpêkirin bênavber didomin. Di civînê de peyama “Divê ku civaka me bê asta ku xwe bi rê ve bibe” hate dayîn.
Civîna gel a ku ji bo peyama Rêberê Gelê Kurd Abdullah Ocalan li her derê baş were fêmkirin bi pêşengiya Tevgera Jinên Azad (TJA), Partiya Wekhevî û Demokrasiyê ya Gelan (DEM Partî) li Parka Mehmet Ûzûn a navçeya Bajarê Nû ya Amedê hat lidarxistin. Di heman demê li navçeyên weke Peyas, Pîran û Bismilê jî civînên gel ên bi vî rengî hatin lidarxistin. Hevşaredara Bajarê Nû Safiye Akdag û endamên meclisê yên şaredariyê, DEM Partiyê ya Amedê, Federasyona Komeleyên Hiqûqî û Hevgirtinê yên Malbatên Girtî û Hikûmxwaran MED (MED TUHAD FED), endamên Komeleya Dayikên Aştiyê û endamên saziyên sivîl ên Amedê beşdarî civînê bûn.
Tespît ji 1990î destpê dike
Endamê MED-TUHA-FEDê Orhan Işik di civînê de axivî û diyar kir ku ji dîrokê heta niha şerê li Rojhilata Navîn qet nehatiye sekinandin û wiha got: “Ev şer li Iraqê ve destpê kir. Hêzên hegemonîk xwestin ku Rojhilata Navîn dîzayn bikin. Rêberê Gelê Kurd Abdullah Ocalan ji salên 1990î ve tespîta vê yekê kir û ev tespît hê jî derbasdar e. Herî dawî şerê ku Îranê berdewam dikir ev tespîta ku Rêberê Gelê Kurd Abdullah Ocalan digot,piştrast kir. Di 27ê sibatê de pêvajo ya nû hat destpêkirin. Di vê hêlê de jî divê em wek ferdên vê civakê xwe nû bikin û xwe li pêş bixin. Divê ku civaka me bê asta ku xwe bi rê ve bibe. Şerê ku li rojavayê Kurdistanê pêk tê hemû polîtîkayên dewletan e. Dewletên kapîtalîst ji bo berjewendiyên xwe dixwazin têkoşîna bi salan e berdewam dike tarûmar bikin.”
Civîn poştî axaftinê bi nîqaşan bi dawî bû.
