Amed – Koma Aştî û Civaka Demokratîk a PKKê îro li bajarê Silêmaniyê bi merasîmekê çekên xwe şewitandin. Ev kêlî li Amedê jî hate temaşekirin. Rêvebera DBPa Amedê Muşeher Ulker wiha got: “Gava ku gerîla avêtiye gava wekhevî û xwişk û biratiyê ye. Ji dewleta Tirk re bang dikim ku demildest gavan biavêje û vê xwînê bide sekinandin.”
Rêberê Gelê Kurd Abdullah Ocalan di 9ê Tîrmehê de di çarçoveya “Pêvajoya Aştî û Civaka Demokratîk” de bangeke nû ya dîrokî kir. Koma Aştî û Civaka Demokratîk a PKKê li ser banga Rêberê Gelê Kurd Abdullah Ocalan îro li bajarê Silêmaniyê yê Herêma Kurdistana Federe bi merasîmekê çekên xwe şewitandin. Hem li Kurdistan û Tirkiyeyê hem jî li herêm û cîhanê bi milyonan kesan bi mereqeke mezin merasîm temaşekirin. Yek ji van cihan jî avahiya Partiya Herêmên Demokratîk (DBP) a Amedê bû. Endam û rêveberên DBPê di nav de gelek kesan li avahiya DBPê ev kêlî temaşekirin. Di dema temaşekirinê de kesên bi rêya televizyonê dîmen temaşe kirin lîlandin û li çepikan dan. Her wiha welatiyan di van kêliyan de dirûşma “Bijî Serok Apo” û “Bijî berxwedana gerîla” berz kirin. Di dema temaşekirina dîmenan de hate dîtin ku dayik hestiyar bûn.
Rêvebera DBPa Amedê Muşeher Ulker a li avahiya partiya xwe dîmen temaşe kirin, banga Rêberê Gelê Kurd Abdullah Ocalan û merasîma çek şewitandinê ya Koma Aştî û Civaka Demokratîk a PKKê nirxand.
‘Divê dewlet demildest gavan biavêje’
Muşeher Ulker bal kişand ser banga Rêberê Gelê Kurd Abdullah Ocalan û wiha got: “Îro rojeke pir girîng e. Tevî Serok Apo û PKKê evqas gav hatine avêtin jî dewleta Tirk hêj tu gav neavêtine. Dewleta Tirk xwe bi ker û laliyê daniye. Ji ber vê yekê fikarên me hene. Bila gaveke mayînde biavêje. Her tişt xistine stuyê Serok Apo. Topa ku Serok Apo avêt nava wan topa aştî, wekheviyê ye. Serok Apo dibêje bila dayikên Kurd, Tirk, Ereb, Çerkez êdî negirîn. Bila ji niha û şunde ev xwîn were sekinandin. Bila her gerilayek were dayikên xwe hembêz bike, xwîn bi xwînê nayê şûştin. 30 hevalên me hatin çekên xwe şewitandin. Gava ku gerîla avêtiye gava wekhevî û xwişk û biratiyê ye. Dewlet dawiya dawî neçare li pey gotina Serok bimeşe. Di vê pêvajoyê de çi kar û xebat bikeve li ser milê me em amade ne. Em ê li pey rêça zarokên xwe bin. Ji dewleta Tirk re bang dikim ku demildest gavan biavêje û vê xwînê bide sekinandin.
