Bedlîs – Parlementerê DEM Partiyê yê Bedlîsê Huseyîn Olan ku di Mîhrîcana Çand û Hunerê ya Tetwanê de axivî, bal kişand ser giringiya rojevê û da zanîn ku têkoşîn bi dawî nebûye, tenê rêbaza wê hatiye guhertin.
Mîhrîcana Çand û Hunerê ya Tetwanê ku bi dirûşma “Em rêya aştiyê bi hunera azad re dihonin” tê lidarxistin, di roja 15an de bi hemû coşa xwe berdewam kir. Îro hunermend Xecê û Hîvron derketin pêşberî guhdarvanên xwe û stranên xwe gotin. Bi deh hezaran kesan ji bo guhdarkirina Xecê û Hîvron li qada konserê kom bûn û di qada konserê de ciwanan pankarta li ser “Bijî Serok Apo û Bijî PKK” dinivîsî rakirin. Her wiha be sedan kes jî, ji ber ku cih di qadê de nema li derdorê bariyeran guhdariya konserê kirin.
‘Ev pêvajo gelek dîrokî ye’
Beriya konserê, parlamenterê Partiya Wekhevî û Demokrasiyê ya Gelan (DEM Partî) yê Bedlîsê Huseyîn Olan axivî. Huseyîn Olan, diyar kir ku pêvajoya heyî pêvajoyeke dîrokî ye û got: “Di wê bangê de, Ocalan banga civakeke demokratîk û aştiyê kir. Wekî ku em hemî dizanin, PKK bi lidarxistina kongreya xwe ya di 5-7ê Gulanê de bersiva banga Birêz Ocalan da. Di 12ê Gulanê de, wan biryara xwe ya hilweşandinê ji cîhanê re ragihand. Çend roj berê dîmena Birêz Ocalan ku banga danîna çekan dikir hate weşandin. Bi ragihandina ku dê ji çekan xatir bê xestin, wî nîşan da ku têkoşîna 40 salî gihîştiye armanca xwe. Hebûna Kurdan hatiye qebûlkirin. Têkoşîna demokratîk dê ji niha û pê ve berdewam bike. Bê guman, têkoşîn bi dawî nebûye; tenê rêbaza wê hatiye guhertin.”
Piştî axaftinê ewilî hunermend Xecê û dû re jî Hîvron derket ser dikê û bi stranên xwe coşa gel bilindtir kirin. Wê sibê ku roja dawî ya mîhrîcanê ye, hunermend Kadîr Çat û Rojda konser bidin.
