Li Şirnexê heya îro 70 civînên gel pêk hatin û îşev jî li navçeyên Silopya û Cizîrê civînên Aştî û Cikava Demokratîk hatin lidarxistin.
Li navçeyên Silopya û Cizîrê yên Şirnexê di çarçoveya Pêvajoya Aştî û Cikava Demokratîk de civînên gel berdewam dikin. Îşev jî li taxa Şax a Cizîrê û li taxa Şehîd Harûn a Silopya bi tevilbûna endamê PMê yê DEM Partiyê Ahmet Îstek, endamê PMê yê DBPê Bunyamîn Şeker, hevserokên DEM Partî û DBPê yên navend û navçeyan û aktîvîstên TJAyê û gelek welatiyan civîn pêk hatin. Piştî rêzgirtina ji bo cangoriyên azadiyê dîmenên Rêberê Gelê Kurd Abdullah Ocalan û merasîma PKKê ya çek îmhakirinê hatin pêşandan.
Endamê PMê yê DEM Partiyê Ahmet Îstek di civîna Cizîrê de axivî. Îstek got ku gelê me gelek êş kişandiye û wiha axivî; “Gelê me çiqas êş kişandibe ewqas berxwedana xwe xurt kiriye. Em bawerin gelê me pêvajoyê baş dişopîne û bi hêza gelê me dê ev pêvajo bi serbilindî bi ser bikeve.”
Piştî axaftinan civîn bi pirsên gel û bersivandina pirsan bi dawî bû.
