Meclisa Ekolojiyê ya Amedê li dijî hewldana talankirina Zozanê Hesendînê daxuyanî da û diyar kir ku desthilatdar bi rêya madanê dixwaze erdnigariya Kurdistanê talan bike û got: Destê xwe ji ser axa me vekişînin.”
Şîrketa Anonîm a Bazirganiya Derve û Kanzakariyê ya Pasûrê ji bo lêgerina kanzayan bi awayekî bêhûqîqî li Zozanê Hesendînê dest bi lêgerina kanên madanê dike. Xelkê Zozanê Hesendînê li dijî madanê dest bi çalakiya nobedê kirin e. Nobed mehekî zêdetir berdewam dike. Meclisa Ekolojiyê ya Amedê û gelek kes çûn serdana nobedê û li vir daxuyanî hat dayîn. Hevberdevkê Meclisa Ekolojiyê ya Amedê Sebrî Kiliç daxuyaniyê xwend. Daxuyanî li pêşiya Ziyareta Bavê Hazir hat lidarxistin
‘Desthilatdar bi destê madenê xwezaya me talan dike’
Sebrî Kiliç diyar kir ku ji sala 2008an ve gelê Pasûrê li dijî madanê axa xwe diparêze û wiha got: “Di salên 90î de di encama politîkayên şer de gundên me hatin şewitandin û xelkên gundan koçberî bajaran bûn. Îro dîsa desthilatdar bi destê sermayeyê û madenê gund, xweza û jiyana me talan dike û dîsa dixwaze gelê me koçber bike. Ev madena ku tê xwestin li Zozanê Hesendînê bê avakirin dê tenê bandorê ne li Pasûrê dê bandorê li tevahiya herêmê bike. Dê ev maden gelî, çiya, newal û erdên me û çemê me ziwa bike. Li erdnigariya Kurdistanê bi rêya madenê, projeyên GES û HESan tê xwestin bê talankirin.”
‘Zozanê Hesendînê ya me ye dê ya me be’
Sebrî Kiliç destnîşan kir ku ev maden çêbibe dê goristan û ziyaretên li herêmê jî werin rûxandin û got: “Îro li erdnigariya Kurdistanê talana ekolojiyê heye. Îro behsa aştiye te kirin lê ev talan hê jî berdewam dike, ev şerm dê siberojê derkeve pêşiya me. Aştî dê azadiya xweza û ajalan jî pek bîne. Aştî neyê erdnigariya Kurdistanê aştiya civakî jî dê pek neyê. Em li vir bang dikin ku destê xwe ji axa me vekişînin. Em li dijî sermayeya kapîtalîst têkoşîna jiyanek azad dikin. Zozanê Hesendînê ya me ye û dê ya me be.”
‘Jiyana me li vir e’
Welatiya bi navê Risket Polat jî diyar kir ku ev der warên wan e û got: “Xwedê heqê me ji wan re nehêle. Bila destê xwe ji zozanên me vekişînin. Her tiştê me li ser zozanan e. Av, heywan û jiyana me li ser vir e. Debara me li vir pêk tê.”
‘Bila destê xwe ji ser axa me bikişînin’
Dayîka bi navê Azîze Can jî destnîşan kir ku ev axa bav û kalê wan e û got: “Kî xerabiyê li axa me bike, xwedê heqê me ji wan re nehêle. Bila destê xwe ji ser axa me bikişînin.”
Daxuyanî bi lêdana çepikan bi dawî bû.
