Şirnex – Goristana endamên PKKê ya li Herêma Feraşînê hatiye rûxandin. Li gorî çavkaniyên herême zêdetirî 80 goran li goristanê hebûn e lê li gorî dîmenan ev qas gor xuya nakin.
Li herêma Şirnexê 5 goristanên ku cenazeyên endamên HPGê û YJA-Starê tê de ne di salên 2012-2015an hatin avakirin û bi sedan cenazeyên endamên HPG û YJA-Starê lê hatibûn veşartin. Ev goristan yek li nêzî gundê Spîndarokê yê di nava Çiyayê Cûdî de, yek nêzî gundê Basret yê di nava Çiyayê Gabarê de, yek nêzî gundê Xirbikê Bestê yê li Herêma Besta, yek Herêma Meydana Kolya ya Çiyayê Kato Jîrka û yek jî nêzî gundê Hindirûnis yê li Herêma Feraşînê hatine avakirin. Piştî sala 2016an hêzên artêşa tirk û cerdevanên herêmê ev goristan kirin hedefa xwe û bi tank û topan, bi makîneyên kar rûxandin.
Li hember goristanê qaleqol hatiye avakirin
Yek ji goristanên hatine rûxandin jî goristana li gundê Hindirûnis yê Herêma Feraşînê ya navçeya Elkê ya Şirnexê ye. Ev goristan di salên 2012-2013an de hat avakirin û weke Şehîdgeha Ş. Memed Goyî (Mehmet Kaplan) û Ş. Rojîn Gewda (Sureyya Aslan) hat binavkirin. Goristan li deşta gundê Hindirûnisê hatiye avakirin û niha ji ber qeleqola li hember goristanê hatiye avakirin tu kes nikare serdana goristanê bike. Ajansa Welat tevî hemû aloziya ewlehiya li herêmê jî xwe gihand ser goristana Feraşînê û dîmenên rûxandina goristanê tomar kir.
Ji ber rûxandinê nayê zanîn gor ên kîjan endamên PKKê ne
Goristan sala 2017an de ji aliyê cerdevan û leşkerên artêşa Tirk ve hatiye rûxandin. Avahiyên weke mizgeft, mêvangeh û avdestxane bi bombeyan hatine hilweşandin û gorên endamên HPGê û YJA-Starê hatine texrîbkirin. Her wiha ji ber ku kêlên nasnavên endamên HPGê û YJA-Starê li ser in hatine şikandin nayê zanîn gor ên kîjan endamên HPGê û YJA-Starê ne.
Zêdetirî 80 gor hebûn e lê di dîmenan de 48 gor hene
Li gorî çavkaniyên herêmê beriya ku goristan were rûxandin, herî kêm 80 gorên endamên HPGê û YJA-Starê di goristanê de bûn û di dîmenên ajansa me kişandin de 80 gor xuya nakin. Her wiha li gor dîmenên ajansa me û çavdêriyên li herêmê 48 gor di goristanê de xuya dikin. Ji ber ku herêma goristan lê ye ji aliyê leşkeran ve tê şopandin tu kes nikare bikeve nava goristanê û hejmarek zelal a gorên di goristanê de derxe holê.
