Şaxa Komeleya Mafê Mirovan (ÎHD) ya Stenbolê ji bo girtiya nexweş Hatîce Onaran ji Wezareta Dadê re name şand.
Şaxa ÎHDê ya Stenbolê, têkildarî rewşa girtiya nexweş Hatîce Onaran a ku ji 10ê Cotmeha 2024an heta niha li Girtîgeha Jinan a Gebzeyê tê ragirtin, ji Wezareta Dadê re name şand.
Endamên komeleyê li pêşiya avahiya komeleyê ya li Beyogluyê daxuyanî da. Di daxuyaniyê de pankartên “Bila tundiya darazê ya li dijî parêzvanên mafê mirovan bi dawî be”, “Hatîca Onaran ne bi tenê ye” hatin hilgirtin. ÎHD’ê di nameyê de diyar kir ku tu delîlên şênber ên ku wê sûcdar bike tune ne û wiha got: “Ragirtina Hatîce Onaranê ne li gorî hiqûq, ne li gorî aqil û ne jî li gorî wijdanê ye. Divê tavilê Hatîce Onaran bê berdan. Daxwaza me ev e. Hatîce Onaran ji sedî 79 astengdar e. Digel vê yekê divê binpêkirinên li dijî girtiyên nexweş bi dawî bibin, ev zerûretek e ku nayê taloqkirin. Herwiha Hatîce Onaran û girtiyên nexweş ên wek wê divê tavilê bên berdan.”
