Dîlok – Meşvanên “Çareseriya demokratîk û azadiyê” li Dîlokê bi nûnerên rêxistinên sivîl re civîn li dar xistin. Hevseroka DBPê Çîgdem Kiliçgun Ûçar di civînê de axivî û xwest tecrîd bê rakirin û pirsgirêka Kurd bi çareserî û aştiya civakî bê bidawîkirin.
Platforma Saziyên Demokratîk ji Amedê ber bi Enqereyê ve “Meşa çareseriya demokratîk û azadiyê” li dar dixin. Meş li Dîlokê didome. Meşvanên azadiyê li Dîlokê serdanên xwe didomîne. Şandeya ji Hevseroka Giştî ya DBPê Çîgdem Kiliçgun Ûçar û meşvanan pêk dihat serdana nûnerên rêxistinên sivîl ên Dîlokê kirin. Civîn li salona Şaxa Egîtîm Senê ya Dîlokê hat lidarxistin. Nûnerên rêxistinên sivîl beşdarî civînê bûn. Di civînê de bi xêrhatina meşvanan hat kirin.
‘Li çar aliyên Kurdistanê şer heye’
Hevseroka Giştî ya DBPê Çîgdem Kiliçgun Ûçar li ser navê meşvanan axivî û diyar kir ku dîsa tê xwestin ku sedsala bihûrî bispêrên wan û wiha got: “Dixwazin dîsa înkar û asîmîlasyonê li ser me berdewam bikin. Li Tirkiyeyê polîtîkaya zordariyê heye. Li çar aliyên Kurdistanê zext û şer hene. Ev hemû ji ber polîtîkayên Tirkiyeyê pêk tên. Helbet em di pêvajoyek girîng de vê meşê li dar dixin. Çimkî li Rojava şerek giran heye. Dixwazin bi destê çeteyan Rojava têk bibin. Meşa me li dijî van êrişên dagirkeriyê ye jî.”
‘Ev meş ji bo azadiya birêz Ocalan e’
Çîgdem Kiliçgun anî ziman ku çareserkirina pirsgirêka Kurd, meseleyek civakî ye û hêjayî çareserkirinê ye û wiha domand: “Gelek qewimandin pêk tên ji tecrîda li Îmraliyê qut nîn e. Hemû partiyên li Tirkiyeyê dixwazin pirsgirêka Kurd di bin kontrol û tekela xwe de bihêlin. Lê pêdiviya me bi hemû aliyan heye ku tev li pêvajoyê bibin û em çareserî û aştiyek mayînde ya civakî pêk bînin. Li cihê ku Kurd xwe lê bi rê ve dibin, hemû dixwazin teslîmî çeteyan bikin. Ji bo azadkirina rêzdar Ocalan me vê meşê daye destpêkirin. Em dixwazin tavilê azadiya birêz Abdullah Ocalan pêk were. Çareseriya demokratîk û azadiyê bi azadkirina birêz Ocalan ve girêdayî ye.”
Çîgdem Kiliçgun Ûçar da zanîn ku tecrîd û qeyûm li Tirkiyeyê bûye sîstemek û rejîmek û got: “Dema hemû beşên civakî tên cem hev, tirs dikeve dilê desthilatdariyê. Lewma ev meşa me girîng e. Di çavê desthilatdariyê de her kesên ku mafên xwe dixwazin wek sûc û terorîst tên dîtin. Divê li dijî vê rika desthilatdariyê her kes hin bêtir mafên xwe bixwazin.”
‘Divê em ji bo azadiya Ocalan deng derxin’
Çîgdem Kiliçgun bal kişand ser tecrîdkirina Rêberê PKKê Abdullah Ocalan û got: “Divê ku birêz Ocalan di warê hiqûqî de azad bibe. Çimkî êdî dema azadkirina wî ya fizîkî derbas bûye. Divê em ji bo azadiya birêz Ocalan û tecrîda li serê wî dengê xwe derxin.”
Civîn piştî nêrîn û pêşniyazên beşdaran bi dawî bû.
Civînên gel hatin lidarxistin
Her wiha şandeyek li avahiya DEM Partiyê ya Navçeya Şehîtkamîl û şandeyek jî li avahiya DEM Partiyê ya Navçeya Şahînbey civînên gel li dar xistin û li ser armanc û naveroka meşê agahdarî û axaftin hatin kirin.
