Li devera Ashantî ya Gana ya Efrîqayê, helîkoptera leşkerî ket xwarê. Di qezayê de Wezîrê Parastinê û Wezîrê Jîngeh, Zanist û Teknolojiyê jî di nav de 8 kes mirin.
Serfermandarê Parastinê yê Ganayê Julius Debrah, bi daxuyaniyeke çapemeniyê ragihand ku li herêma Adansî Brofoyedu ya eyaleta Ashantî, helîkopterek leşkerî kete xwarê. Di daxuyaniyê de hate diyarkirin ku di helîkopterê de sê endamên tîma helîkopterê û pênc rêwî hebûn ku hemûyan jiyana xwe ji dest dane. Di nav kesên ku mirine de Wezîrê Parastinê Edward Omane Boamah û Wezîrê Jîngeh, Zanist û Teknolojiyê Îbrahîm Murtala Muhammed jî hene.
Julius Debrah tekez kir ku bûyer trajediyek neteweyî ye û daxwaz kir ku heta daxuyaniyek din li hemû saziyên fermî yên welêt alên daliqandî werin nîvço kirin. Hêzên Çekdar ên Ganayê bi daxuyaniyekê ragihand ku helîkoptera ku ji paytext Akrayê ber bi Obuasi ve difiriya, piştî demekê ji radarê winda bû. Di derbarê curê helîkopterê de ti agahî nehat dayîn, lê hat destnîşankirin ku xebatên lêgerîn û rizgarkirinê li cihê bûyerê berdewam dikin.
Heta niha têkildarî sedema qezaya helîkopterê de ti agahî û daxuyaniyek fermî nehatiye dayîn.
