Amed – Rêxistinên pîşeyî yên rojnamevanan ku qetilkirina Cîhan Bîlgîn û Nazim Daştan şermezar kirin, destnîşan kirin ku hedefgirtina rojnamevanan sûcê şer e û gotin: “Ne kameraya rojnamevanan ne jî pênûsa wan dê tu carî li erdê nemîne.”
Rojnamevan Cîhan Bîlgîn û Nazim Daştan di 19 Kanûnê de dema karê xwe yê rojnamevaniyê dimeşandin, li ser rêya di navbera Bendava Tişrîn û bajaroka Sirînê de wesayita wan ji aliyê balafireke bêmirov û biçek (SÎHA) a dewleta tirk ve hat bombebarankirin û hatin qetilkirin. Gelek saziyên pîşeyî yên rojnamevanan, sazî û dezgehên sivîl ên civakî û partiyên siyasî qetilkirina Cîhan Bîlgîn û Nazim Daştan şermezar kirin. Hevserokê Komeleya Rojnamevanan a Dîcle û Firatê Selman Çîçek, Seroka Komeleya Rojnamevanên Jin a Mezopotamyayê (MKG) Roza Metîna û Nûnerê DÎSK Basin-Îşê yê Amedê Hakki Boltan qetilkirina Bîlgîn û Daştan û armanca hedefgirtina wan nirxandin.
‘Hevalên me heqîqet dişopandin’
Hevserokê DFGê Selman Çîçek bi bîr xist ku êrişên dewleta Tirk û koma paramîlîter SMO ya girêdayî wê yên li ser Bakur û Rojhilatê Sûriyeyê berdewam dikin û wiha got: “Çapemeniya tirk polîtîkayên şerê qirêj didomînin û dixwazin bi nûçeyên çewt kelecan û baweriya gel bişikînin. Lê hevalên me Cîhan û Nazim li wir heqîqet dişopandin. Dixwestin nûçeyên rast û heqîqetê derxînin holê û van ji rayagiştî re pêşkeş bikin. Hevalê me yên Nazim hem li Reqayê hem li Kobanê û hem li aliyê Şengalê nûçe çêkirin. Heqîqet dişopand. Hevala me Cîhan jî li Kobanê li Reqayê li aliyê Qamişloyê hem nûçeyên heqîqetê hem jî nûçeyên jinên azad dişopandin. Armanca her du hevalên me heqîqet bû, aştî bû. Nûçeyên wan jî civakî bûn û ji bo aştiyê bûn.”
‘Rojnamevan bi zanebûn hedef girtin’
Selman Çîçek, diyar kir ku dewleta Tirk rojnamevan bi zanebûn hedef girtin û wiha domand: “Berê jî li Silêmaniyê hevalên Gulistan Tara û Hêro Bahadîn hatin hedefgirtin. Ev ne dawî ye. Ji Cengîz Altûn heta Nazim, heta Cîhan Bîlgîn hêj jî şehîdên me çêdibin. Lê em ê dest ji şopandina wan bernedin, em ê heta dawiyê ji bo heqîqetê binivîsin.”
‘Ji ber ku rastî derxistin holê hedef hatin girtin’
Seroka MKGê Roza Metîna jî got ku “Li dijî rojavayê Kurdistanê êrişeke mezin heye” û wiha axivî: “Piştî ku hevsengiya leşkeri û polîtîk a Sûriyeyê guherî û şunde li wir êrişên dewleta tirk hin zêdetir û dijwar bûn. Ji xwe berê jî êriş hebûn û berê jî rojnamevan dibûn hedef. Niha jî hedefgirtina kedkarên Çapemeniya Azad jî ji bo rastiyên niha li Rojava li Sûriyeyê diqewimin dernekevin holê. Rojnamevan Cîhan Bîlgîn û Nazim Daştan li wir di nava şert û mercên zehmet de ji bo heqîqetê ji gel re ragihînin û bi taybetî jî nelirêtî û qirêjiyên ji aliyê komên paramîlîter ên girêdayî dewleta tirk ve, îro li ser wê axê rûdidin radigihandin. Ji ber ku vê rastiyê derdixînin holê hedef tên girtin. Di heman demê de li gel derxistina holê ya rastiyan li wir têkoşînek jî heye. Li wir bi pêşengiya jinên kurd têkoşîneke li dijî van êrişan heye. Bi taybetî kedkarên çapemeniya azad jî hem vê têkoşînê nîşanî Rojhilata Navîn dide hem jî nîşanî cîhanê didin. Ji ber ku ew têkoşîn jî dernekeve holê û belav nebe û ji bo ku mirov ji wê têkoşînê feyze negirin ev êriş tên kirin. Berê jî bi taybetî li wir jinên rojnamevan hatin hedefgirtin. Ji bo ku rola jinê ya li qada çapemeniya azad gelekî girîng e û ji civakê re jî dibe mînakeke erênî.”
‘Em ê li dijî êrişan dev ji pênûsa xwe bernedin’
Roza Metîna, bi bîr xist ku pîşeya rojnamevaniyê pîşeyeke girîng e û wiha domand: “Ev rol û misyona kedkarên çapemeniya azad jî dibe hedef. Îro li Tirkiyeyê û Kurdistanê rojnamevan di bin zext û zordestiyê de ne. Nahêlin ku qadeke azad rojnamevan karên xwe bikin. Rojnamevanan binçav dikin, digirin, zordestiyê li wan dikin. Bi vî awayî dixwazin bitirsînin. Dixwazin li rojavayê Kurdistanê û Bakur û Rojhilatê Sûriyeyê jî rojnamevan karên xwe nekin. Û li wir jî bi SÎHAyan êriş dikin. Em dikarin bejin li dijî Çapemeniya Azad êrişên piralî hene. Li dijî van êrişên piralî jî weke MKG û DFG em jî li qadê daxuyaniyê didin û em dengê xwe li dijî qetilkirina rojnamevanan bilind dikin. Em dibêjin wê tu carî ne kameraya rojnamevanan ne jî pênûsa wan li erdê nemîne. Em ê her tim li keda çapemeniya azad xwedî derkevin. Em ê li dijî van êrişan dev ji pênûsa xwe bernedin. Rojnamegerî ne sûc e.”
‘Ji aliyekî sûcê şer e ji aliyê din jî neyartiya li dijî rojnamevanan e’
Nûnerê DÎSK Basin-Îşê yê Amedê Hakki Boltan jî bi lêv kir ku careke din bi êrişeke li dijî rojnamevanan hişyar bûn û wiha got: “Beriya êrişê hem Nazim hem jî Cîhan li ser karê xwe bûne. Karê xwe dikirin, nûçegihanî dikirin. Agahiyên didan jî agahiyên gelek krîtîk bûn. Hem ji aliyê Bendava Tişrînê ve hem jî ji aliyên din ve agahiyên ku dan rastiya şer a li wê derê destnîşan dikirin. Xuya dike ku kesên ji wan agahiyan ne rehet bûn hebûn. Ew kesên ji wan rastiyan û agahiyan ne rehet bûn xuyaye ku desthilata dewleta Tirkiyeyê bû. Hatiye pesendkirin ku bi SÎHAyên Tirkiyeyê êriş pêk hatiye. Ev jî nîşan dide ku bi zanîn hedef hatine girtin û rast e rast hatine qetilkirin. Dihate zanîn ku ew rojnamevan in û ji nûçeyê tên lê dîsa êriş kirine. Ji aliyekî ve sûcê şer e ji aliyê din jî neyartiya mezin a li dijî rojnamevanan e. Bi taybetî jî rojnamevanên kurd. Em careke din li vir dibin şahidê neyartiya li rojnamevanên kurd. Çawa ku Cîhan û Nazim xebatên xwe li qada şer pêkdianîn. Cihê ku herî xeter û herî zêde rastî lê dihate veşartin nûçegihanî dikirin. Ji bo rayagiştî agahiyên rast dişandin. Ev jî çandeke, çanda Çapemeniya Azad bi xwe ye. Hemû xebatkarên çapemeniya azad xwediyê wê helwestê ne. Ew helbest xebatkar û xizmetkarê şopandina heqîqetê ye. Ev yek dê her tim berdewam bike. Ji 1990î heta îro ev têk neçûye her ku çûye xurt bûye. Bi qetilkirina hempîşeyên me bi tu awayî encamekî nagirin. Berovajiyê vê dê dewleta Tirkiyeyê dê di raya giştî û cîhanê de dê teşhir û mehkum bike.”
