Nobedarên li hember talana xwezayê li Herêma Besta kom bûne di kursiya axaftina azad de hest û nêrînên xwe anîn ziman. Dayîka Aştiyê Hasîbe Mengîrkaon anî ziman ku çiyayên Kurdistanê ji bo wan bêhn e, nefes e.
Li navbera gundên Bişiyê Reş û Çemê Tawî yên salên 1990î ji aliyê dewletê ve hatin valakirin bi tevlîbûna Hevseroka Giştî ya DEM Partiyê Tulay Hatîmogûllari, hevserokên DBPê Çîgdem Kiliçgun Ûçar û Keskîn Bayindir, gelek parlamenterên DEM Partiyê, endamên rêxistinên ekolojiyê, endam û rêveberên partiyên siyasî û sedan welatiyan nobeda li hember talana xwezaya berdewam dike. Di nobedê de kursiya axaftina azad hat danîn. Gelek kesan di kursiya axaftina azad de hest û nêrînên xwe anîn ziman.
Divê li hember talanê em bibin yek
Endama Dayîkên Aştiyê ya Mêrdînê Hasîbe Mengîrkaon gotinên Serokomar Erdogan yên derbarê êrîşên dewleta tirk ên li hember Tevgera Azadiyê bi bîr xist û wiha axivî; “Erdogan bi axaftinek xwe de gotibû ‘li hember Tevgeriya Azadiyê dema em şer dikin bi leşkerî, aborî, siyasî çi hewce bike em ê bikin.’ Îro çiyayên Kurdistanê bêhnê dide me, nefesê dide me, çiyayên me ji bo me xweza ye. Çiyayên me, gundên me, ajalên me, mirovên me qetil dikin. Îro li hember vê yekê divê em bibin yek.”
Kesên zirarê didin xweza û doza kurdan ji rêya şaş vegerin
Mengîrkaon bal kişand ser talana xwezayê ya bi destê dewleta tirk û cerdevanên herêmê û axaftina xwe wiha bi dawî kir; “ Eger hin kesan alîkarî nedaya wan heya niha ji zû ve ji dewleta tirk ji Kurdistanê derketibû. Îro vê Kurdistana delal bi destê leşker û cerdevanan qetil dikin. Em dibêjin bila navê we weke Enkîdûyan nekeve dîrokê bi lenetî. Em dibêjin navê lenetî li ser xwe biavêjin. Hûn teyr in Kurdistan erd e, hûn çiqas bifirin hûn ê dîsa werin ser erd danin. Em ji Besta bang li kesên doza xwe dûr dikin, ji rêya şaş vegerin. Ev dewlet ne xwediyê vê axê ye. Xwediyê vê axê hûn û werin bikevin nava gelê.”
Çalakiya nobedê bi gotina stranan stanan û gerandina govendê berdewam dike.
