Şirnex– Artêşa Tirk li Botanê ji sala 2015an şûn de bi dehan qeleqolên leşkerî li şûnwarên gundên salên 1990î hatine valekirin, ava kirine. Niha di çavdêriya van qeleqolan de xwezaya Botanê talan dikin.
Li Herêma Botanê piştî sala 2015an dewletê berê xwe da çiyayên Cûdî, Heftenîn, Kato, Herekol û Gabarê. Dewletê li navser û qontarên van çiyayên ku di salên 1990î de bi dehan gund hatibûn valekirin, dest bi çêkirina qeleqolan kir. Bi çêkirina qeleqolan re talana li ser xwezaya herêmê derket asta herî jor.
Vegera gundan qedexe ye
Li navser û qontarên Çiyayê Cûdî bi dehan gund hatine valekirin. Ji bilî çend gundan hê jî vegera gundên Divin, Cifane, Akêt, Gilindor, Spîndarok, Gundikê Remo, Nêvava, Bilga, Cilbiya, Silib, Girê Çolya, Babga, Sorbitmê, Germgê, Şemga, Dêrgê, Xinis, Hesedoka, Bêşêrê, Şax û Hebler qedexe ye. Li şûnwarên van gundan qeleqol hatine avakirin û di bin kontrola van qeleqolan de qanên komirê tên vekirin û daristan tên birîn.
Bi bendav û qeleqolan Kurdistanê parçe dikin
Di salên 1990î de gundên Hoze, Mêre, Dêryan, Axyan, Xwarê Şêro, Pîrane, Hîlal, Nêrweh, Hodane, Ziravkê, Kalgê, Mijîn, Şirîş, Tolgan ji aliyê dewletê ve hatine valekirin. Li Heftenîn jî bi dehan qeleqol hatine avakirin û di bin kontrola van qeleqolan de xweza tê talankirin. Dewletê bi bendavên çêkirîn û amadekariya çêkirina wan dike, dixwaze Qilebanê û Heftenîn bi van bendavên ewlehiyê qut bike.
Gund vala kirin û li şûna wan qeleqol ava kirine
Herêma Besta û qontarên Çiyayê Herekol dema dibe şev ji bilî ronahiya qeleqolên leşkeri tiştek xuya nake. Li seranserî herêmê qeleqol hatina çêkirin û ev qeleqol li şûnwarên gundên weke Avyan, Kenî Ferşkê, Xirbê Bestê, Kenî Sîvgê, Behra Hincê, Çala, Sergê Mehemê Oso, Kela, Çemkê Tehlo, Bacît, Giregê, Romaran, Kûrta Xanê, Tûşimya, Cinîwer, Bişiyê Reş, Zirvî, Bolûzer hatine avakirin. Ev gund hemû dikevin nava Herêma Besta û cerdevanên herêmê hemû daristanên van gundan dibirin.
