Parêzera Ayşe Gokkan Berfîn Gokkan, anî ziman ku Eyşe Gokkan 5 sal û 4 meh û 14 roj bê sûc tê cezakirin û wiha got: “Bi biryarên siyasî Ayşe Gokkan ceza dikin. Ayşe Gokkan ji ber tev li çalakiyên meş û daxuyaniyan bûye tê cezakirin. Bê sûc ceza dikin.”
Aktîvîsta TJAyê Ayşe Gokkan dê di 11ê Îlonê de 2yemîn danişîna wê ya dozê li 9emîn Dadgeha Cezayên Giran a Amedê bê dîtin. Parêzer ji bo parastina Ayşe Gokkan amadekariyê dikin. Di 11ê Kanûna 2024an de 2yemîn Daîreya Ceza ya Dadgeha Bilind, der barê Aşye Gokkan de cezayê “Propaganda rêxistinê” erê kiribû. Dadgehê biryar dabû ku sûcdariya “bi zanebûn û xwestin alîkarî daye rêxistinê” betal bike.
Piştî dosya xera bû, di 16ê Hezîrana 2025an de ji nûve li 9emîn Dadgeha Cezayên Giran a Amedê hat dîtin. Dadgehê di danişîna yekemîn de dîsa biryara berdewama girtinê da. Dê danişîna duyemîn di 11ê îlonê de li 9emîn Dadgeha Cezayê Giran a Amedê berdewam bike.
Têkildarî darizandina Ayşe Gokkan Parêzera Ayşe Gokkan Berfîn Gokkan, diyar kir ku li gorî hiqûq û zagonan divê bi lez Ayşe Gokkan serbest bê berdan û wiha axivî: “Hemû delîlên dosyayê hatine komkirin. Tu îhtîmala delîlên bên reşkirin û veşartin tune ne. Ev dosya ji 2017an de hatiye vekirin û têra xwe delîl kom kirine. Ayşe Gokkan ji 2017an heta niha tu carî nereviya ye û tu hewldana wê ya revê jî çênebûye. Dema nehatiye girtin tedbîrên konrola edlî dane Ayşe Gokkan. Ayşe Gokkan jî li gorî van tedbîran tev geriya ye û tu carî hewldana wê ya revî û hewldana wê ya reşkirina delîlan çênebûye. Ayşe Gokkan nêzî 5 sal û 4 meh û 14 roj in girtî ye. Ev girtin êdî bûye înfaz. Ji ber vê yekê divê bi lez bê berdan.
Dema mirov li esasê dosyayê dinere, di dosyayekê de 3 caran cih guheriye. Di dosyayekê de jî 2 caran cih guherî ye. Dadgeha Bilind biryara ku berê daye, bi xwe xera dike û dîsa li Dadgehên Herêmî vedigerîne.”
Prz. Berfîn Gokkan da zanîn ku di halê dawî de di hinceta xerakirina dosyayê de li ser 11 çalakiyên Ayşe Gokkan dike hincet û wiha lê zêde keir: “Ev çalakî bi temamî li ser esasê aştiyê ne û li dijî tundiyê ne. Dîsa dadgehê îfadeya şahidê nepen esas girtiye. Di îfadeyên şahidan de jî agahiyên şênber tune ne. Agahiyên razber û bi temamî li ser gote gotan îfade dane. Tevlêbûna Ayşe Gokkan a çalakiyên daxuyanî û meşan nabe sûcê propagandayê.”
‘Divê Ayşe Gokkan serbest berdin’
Parêzer Berfîn Gokkan da zanîn ku Ayşe Gokkan hem girtî ye û hem jî bi awayekî girtî ji nûve tê darizandin û wiha bi dawî kir: “Bi darizandin û girtina wê, dixwazin wê ceza bikin. Em dibêjin girtina Ayşe Gokkan girtineke siyasî ye. Li gorî fermana siyasî biryar tê dayîn. Heta niha hemû parastinên ku min ji bo Ayşe Gokkan kiriye, ji aliyê Serokê Dadgeha berê ve hatine astengkirin. Em hêvî dikin ku di vê danişînê de Ayşe Gokkan serbest bê berdan.”
Çi bûbû
Dadgeha Bilind cezayê girtîgehê yê 19 sal û 6 mehan ku 2 caran bi îdiaya “endamtiya rêxistinê” li Berdevka Demê ya Tevgera Jinên Azad (TJA) a berê Ayşe Gokkan hatibû birîn, betal kir. Dadgeha Bilind biryara 9emîn Dadgeha Cezayê Giran a Amedê ya ku bi giştî 30 sal cezayê girtîgehê dabû, bi qismî betal kir.
19 mijdar 2023: Paul Gruenînger (1891-1972), sînorê Swîsreyê ji bo penaberên ji Naziyan direviyan vekir û gelek penaber xelas kiribû. Weqfa Paul Gruenînger, her sal ji bo bîranîna Gruenînger “Xelata Mirovayî û Wêrekiyê” dide. Weqfê, xelata îsal da Berdevka Demê ya Tevgera Jinên Azad (TJA) a berê Ayşe Gokkan û penabera karker a polonyayî Paula Weremiuk. Ji bo dayîna xelatê li eywana pêşangehan a Palace ya Kantona St. Gallenê torenek hat lidarxistin û xelat hatin dayîn.
18 Mijdar 2023: Xelatên “mirovahî û wêrekiyê” yên ku her sal ji aliyê Weqfa Paul Grunînger ve ku di sala 1998an de ji aliyê neviyên Grunînger ve hatiye avakirin, ji aktîvîstên li dijî gef û zilmê têdikoşin re tê dayîn. Xelatên îsal ji bo parêzvana mafên mirovan a kurd Ayşe Gokkan ku li Girtîgeha Jinan a Sîncan a Enqereyê girtî ye û ji xebatkara penaber a Polonî Paula Weremiuk hatin dayîn.
22 kanûn 2023: Berdevka Berê ya Tevgera Jinên Azad (TJA) Ayşe Gokkan ku di 28ê Çileya 2021ê de li Amedê bi îdiaya “Rêvebera rêxistinê ye” û “endamê rêxistinê” ye hat girtin. Di 2yê Adara 2023yan de ew şandin Girtîgeha Jinan a Sîncanê. Der barê Gokkanê de bi hinceta “Herêmên qedexeya leşkerî û herêmên ewlehiyê binpê kiriye” û “zerar daye milkê gel” 1 sal û 8 meh cezayê girtîgehê lê hatibû birîn. Ji hêla Îstînafê biryar hat betalkirin û carek din doz hat lidarxistin.
