Amed – Hevserokê DBPê yê Amedê Ahmet Dogan ku duh tev li meşa “Mafê Hêviyê” ya li Amedê bû destnîşan kir ku heta deriyê Îmraliyê neyê şikandin ev gel nasekine û diyar kir ku heta Rêberê Gelê Kurd Abdullah Ocalan azad bibe dê li qadan bin.
Platforma Saziyên Demokratîk, duh li Amed, Mêrsîn û Wanê bi dirûşma “Ji bo mafê hêviyê yê Rêber Apo em ber bi azadiyê ve dimeşin” meşên girseyî li dar xist. Bi deh hezaran kes tev li meşan bûn, xwestin biryara “Mafê hêviyê” were bicihanîn û azadiya fîzîkî ya Rêberê Gelê Kurd Abdullah Ocalan pêk were. Yek ji pêkhateyên Platforma Saziyên Demokratîk jî Partiya Herêmên Demokratîk (DBP) e. Hevserokê DBPê yê Amedê Ahmet Dogan têkildarî peyamên di meşan de hatin dayîn û astengkirina meşan ji ajansa me re axivî.
Ahmet Dogan da zanîn ku saleke ev pêvajoya heyî dest pê kiriye û wiha got: “Rêberê Gelê Kurd gaveke pir şênber avêt. Li Tirkiyeyê û Rojhilata Navîn xetimandinek hebû. Rêberê Gelê Kurd gavek avêt ev xetimandin hinek ji holê rakir. Pêşiya pergalê jî û pêşiya gelê Kurd jî vekir. Dîyalogek da destpêkirin. Lê di nava dewletê de hinek tevlihevî heye. Qismek xeteriya li ser welatê xwe dibînin. Ev dixwazin aştiyek pêk were. Lê belê baskê din jî naxwaze aştî pêk were. Rêberê Gelê Kurd jî bi vê gavê xwest destê baskê aştîxwaz xurt bike. Gel di vî warî de bi Rêberê xwe bi bawer e, li pey Rêberê xwe ye. Me duh jî di dîmen û wêneyan de dît. Gava pergalê ya destpêkê kelecanek ava nekir. Lê dîmenekî Rêberê Gelê Kurd daxuyaniyên wî kelecaneke pir mezin da avakirin. Îro kelecanek hebe bi saya Rêberê Gelê Kurd çêbûya. Hêviya gelan ji Rêberê Gelê Kurd heye.”
‘Xelasiya Komara Tirkiyeyê bi Rêber Apo pêkan e’
Ahmet Dogan di berdewama axaftina xwe de ev tişt gotin: “Polîsan duh gotin ku poster û alên ku wêneyên Rêber Apo li ser di meşê de naxwazin. Bi wî hişmendiyê hatin qadê. Bi hezaran polîs hatibûn. Hinek tirs heye. Ji ber ku kelecana gel û xwedîderketina li Rêber Apo dibînin. Yanî ew beşa ku naxwaze ev aştî bi encam bibe naxwaze ev kelecan pir derkeve holê. Naxwaze girse mezin bibe û dengê gel bilind bibe. Lê ne tenê xelasiya gelê Kurd xelasiya Komara Tirkiyeyê bi Rêber Apo pêkan e.”
‘Heta Rêber Apo azad nebe wateya tu tiştî tune ye’
Ahmet Dogan bal kişand ser meşa duh li Amedê hate li dar xistin û wiha pê de çû: “Gel pir zelal vê dibêje ‘Em azadiya Rêberê xwe dixwazin’. Me di dirûşmeyan de jî dît dibêjin ‘Bê Serok Jiyan Nabe’. Dibêjin ‘Sed heb aştî çêbin jî heta Rêberê me dernekeve tu wateya wê nîne.’ Gelê Kurd ku duh li qadan bû dibêje ‘Heta Rêber Apo azad nebe wateya tu tiştî tune ye’ Heta ku deriyê Îmraliyê neyê şikandin ev gel nasekine. Ev gel pir bi biryar e, me coşa gel a duh dît. 52 sal in di van hestan de kêm bûn çênebûye. Her tim girêdayîna Rêber Apo zêdetir bûye. Xeta wan a sor e. Ev gel bi her awayî bi Rêberê xwe ve girêdayî ye. Heta dawiyê jî wê girêdayî be. Me duh dîmenê vê yekê dît. Ev kelecan dît. Gel dibêje ‘em di vê pêvajoyê de bi desthilatê ne bawer in, em tenê bi Rêber Apo bawer in. Divê ew jî li derve be. Divê azad bibe, di şert û mercên azad de li ser maseyê muzakereyê bide meşandin. Wekî din em tu rê û rêbazan napejirînin. Ji ber vê yekê divê demildest Rêberê me azad bibe.’”
‘Êrişên wan li dijî pêvajo û aştiyê ne’
Ahmet Dogan nerazîbûn nîşanî astengkirina meşen duh da û wiha domand: “Hêzên li hemberî aştiyê li Wanê û Mêrsînê jî derketin holê. Ev êrişên wan li dijî pêvajoyê û aştiyê ne. Ev aştî çiqas ji me re lazim be deh qatî wê ji Komara Tirkiyeyê re lazim e. Rêberê Gelê Kurd dixwaze wan pirsgirêkên di sedsala 20an de hatine jiyîn di sedsala 21an de çareser bike rûpeleke nû veke, di vê rûpelê de jî hemû gelên Rojhilata Navîn û Komara Tirkiyeyê tevî gelan her kes bi rengê xwe bi mafê xwe yê bingehîn di nav aştî û demokrasiyê de bijî. Rêberê Gelê Kurd aktorê sereke yê pêvajoyê ye.”
‘Ji bo destê Rêberê Gelê Kurd xurt bibe em ê li qadan bin’
Ahmet Dogan di dawiya axaftina xwe de ev bang li rayedarên desthilatê kir: “Divê komîsyona hatiye avakirin demildest here Îmraliyê. Çareyeke din nîne. Divê ji vê dudiliyê derkevin. Ev dudiliya wan pêvajoyê dereng dixîne. Pêvajo dirêj dibe ji provokasyonan re vedibe. Hêzên hundir û yên derve dixwazin vê pêvajoyê xera bikin. Ji wan re derfet çêdibe. Rêberê Gelê Kurd ji desthilatê re derfet ava kiriye, yekane çare ew e ku li ser maseyê bi Rêberê Gelê Kurd re rûnin ev sozên dane û peywîra li ser milê wan divê bi cih bînin. Divê Rêberê Gelê Kurd demildest ji bin esaretê derkeve. Hêviya gel jî hêviya hemû sazî û dezgehên me jî ev e. Rojeva me ya ewil azadiya Rêberê Gelê Kurd e. Serokê MHPê got ‘çûkek bi baskekê tene nikare bifire.’ Rast e bi hêlekê tişt naçin serî lazim e desthilat demildest gavan biavêje. Ji bo ku gav biavêjin weke Wan, Mêrsîn û Amed em ê li qadan bin. Ji bo destê Rêberê Gelê Kurd û baskê aştîxwaz xurt bibe em ê di kolanan de bin, em ê li qadan bin tişta dikeve ser milê me em ê bikin. Em nasekinin.”
