Hevserokê Meclisa Gel a Demokratîk a Mexmûrê Ehmed Şehbaz û ajokarê bi navê Gabar Nas dema ji Silêmaniyê ji nexwexaneyê divegeriya li bendeke ya kontrolê ya Hewîce ji aliyê artêşa Iraqê ve hatiye girtin û heta niha nehatiye berdan.
Dema Hevserokê Meclisa Gel a Demokratîk a Wargeha Penaberan a Şehîd Rûstem Cûdî (Mexmûr) Ehmed Şehbaz ji bo tenduristiyê çûbû Silêmanî di vegerê de 18ê Îlonê li gel ajokarê bi navê Gabar Nas li bendeke ya kontrolê ya li Hewîce ya artêşa Iraqê hate girtin û heta niha nehatine berdan.
Li gorî agahiyên hatin girtin, ti hincet nîne ku Hevserokê Meclisê û ajokar bên girtin, ev tenê nêzîkatiyeke kêfî ye.
Hêjayî bibîrxistinê ye ji 10ê Nîsana îsal ve hikûmeta Iraqê ambargo û dorpêçeke tund daniye ser Mexmûrê û rê nade amûr û kelûpelên avahîsazî û binesaziyê bikevin wargehê. Dîsa gelek caran di rê de karkerên diçin bajarên Iraqê bê hincet tên girtin û bi rojan tên hebiskirin.
Beriya niha Şandeya Rêveberên Mexmûrê dema ji bo çareserkirina pirsgirêkên wargehê ji bo hevdîtina li gel rayedarên Iraqê Hevserokê Meclisa Gel a Demokratîk a Mexmûrê Ehmed Şehbaz û hevşaredar û endmê dîplomasiyê jî di nav de 14ê Gulanê hatibû girtin û 37 rojan hatibûn hebiskirin.
