Meşa hêviyê ya ku ji Amedê destpê kir di roja duyem de li Rihayê didome. Meşvanên hêviyê li Curnê Reş çûn ser gorên cangoriyan wan bi bîr anîn. Piştî merasîmê meşvanên hêviyê ber bi Xalfetiyê ve bi rê ketin.
Meşa TJAyê bi dirûşma “Bi hêvî em ber bi azadiyê ve dimeşin” daye destpêkirin di roja 2yemîn de li navçeya Curnê Reş a Rihayê didome. Jinên ku hatin ber avahiya Rêxistina Partiya Wekhevî û Demokrasiyê ya Gelan (DEM Partî) a Curnê Reş kom bûn li vir stran gotin û dirûşmên “Jin jiyan azadî, azad bikin Rêbertî”, “Bijî Serok Apo” berz kirin. Jin dûre derbasî Goristana Asrî ya Curnê Reş bûn û li vir kesên di têkoşîna azadiyê û demokrasiyê de jiyana xwe ji dest dane bi bîr anîn.
‘Em ê têkoşîna wan bidomînin’
Piştî deqîqeyekê rêz hat girtin û jinan dirûşma “Jin jiyan azadî” berz kirin. Dûre aktîvîsta TJAyê Fatma Ablay li vir axivî. Fatma Ablay diyar kir ku karwana hêvî û azadiyê ber bi Enqereyê ve diçe û wiha got: “Îro her gava ku jin li vê erdîgariyê diavêjin girîng e. Em îro li ser gora Xelîl, Cûma, Fîdan, Sûltan, Memed in û wan bi bîr tînin. Heta ku azadiyeke mayînde pêk were wê berxwedan hebe. Em ê têkoşîna wan bidominin.”
‘Divê mafê hêviyê neyê taloqkirin’
Fatma Ablay di berdewama axaftina xwe de wiha got: “Îro meşa me ji bo azadiya fizîkî ya Abdullah Ocalan e. Azadiya wî azadiya jin û ciwanan û hemû gelan e. Îro her gava ku em diavêjin dibe wesîle ku aştî pêk were. Îro em ji bo azadiya fizîkî ya Abdullah Ocalan ber bi Enqereyê ve diçin. Lê ew azadiya xwe di azadiya gelan de dibîne. Îro behsa mafê hêviyê tê kirin lazime mafê hêviyê neyê taloqkirin demildest pêk were û bingehe aştiyê were danîn.”
Dûre jin ji goristanê heta avahiya DEM Partiyê ya Curnê Reş meşiyan. Jin ji wir jî bi dirûşm, tilîlî û gotina stranan heta derketina Curnê Reş meşiyan. Li vir endama TJAyê Çîmen Fîdan axivî û wiha got: “Em bi hêvî ber bi azadiyê ve dimeşin. Em li warê têkoşînê ne ku agirê azadiyê lê hat vêxistin. Meşa li vir hêzeke pir xurt da me. Berî 40 salan birêz Abdullah Ocalan bi hevalên xwe re li vir dest bi meşa azadiyê kir. Bi dehan sal bi ser wê rojê re derbas bûn. Bedelên mezin hatin dayîn. Lê ev meş her ku çû mezin bû. Em weke TJAyê gotina xwe dîsa dubare dikin. Me di 27ê sibatê de got em ê pêşengiya vê pêvajoyê bikin û îro em dîsa li ser gotina xwe ne. Divê demildest mafê hêviyê pêk bê. Em silavên xwe ji vir heta Îmraliyê dişînin. Me ji paytexta Kurdistanê dest bi meşê kir û em ê heta paytexta Tirkiyeyê bimeşin û azadiya fizîkî ya Abdullah Ocalan pêk bînin.”
Jinan piştî axaftinê dirûşma “Bê Serok jiyan nabe” berz kirin û ber bi Xalfetiyê re bi rê ketin.
