Enqere – TJAyê di roja 7an a meşa bi dirûşma “Em bi hêviyê ber bi azadiyê ve dimeşin” de ji bo pêkhatina aştiyê, xwest Azadiya Rêberê Gelê Kurd Abdullah Ocalan û girtiyên siyasî were pêkanîn.
Tevgera Jinên Azad (TJA) ku bi dirûşma “Em bi hêviyê ber bi azadiyê ve dimeşin” di 1ê Cotmehê de ji Amedê ber bi Enqereyê ve meş dabû destpêkirin û meş di roja 7an de li Enqereyê berdewam dike. Jinên di nav de Aktivîsta TJAyê Sebahat Tuncel, parlamenterên Partiya Wekhevî û Demokrasiyê ya Gelan (DEM Partî) û endamên sazî û nûnerên Platforma Saziyên Demokratîk hene, li Guvenparkê hatin li gel hev. Jinan li vir, dirûşmeyên “Jin Jiyan Azadî, azad bike Rêbertî”, “Mafê heviyê nayê astengkirin”, “Azadî azadî azadiya Rêbertî”, “Mîmarê aştiyê li Îmraliyeyê”, “Silav silav ji Îmraliyê re hezar silav”, “Bê Serok jiyan nabe”, “Girtiyên siyasî rûmeta me ne” û “Mafê heviyê mafê Gelan e” berz kirin û pankarta “Em bi hêviyê ber bi azadiyê ve dimeşin” vekir. Nameya ku Rêberê Gelê Kurd Abdullah Ocalan ji meşvanan re şandiye ji hêla Zeynep Karayılan ve hat wendin. Heya name were xwendin girse bi berzkirina dirûşmeyan û stranan daxwaza azadîya Rêberê Gelê Kurd Abdullah Ocalan û girtiyên siyasî kirin.
‘Azadiya Ocalan azadiya gelê Kurd e’
Aktîvîsta TJAyê Sebahat Tuncel di daxuyaniyê de anî ziman ku şer herî zêde bandorê li ser jinan dike û wiha got: “Aştî ji bo me ne tenê daxwazek e, pêdiviyek e. Em ji hemû kesên ku piştgiryê didin meşê re spas dikin. Em jin li dijî serdestiya pergala zilam bin. Ji bo wê li Rojava heta hemû cihanê em piştgiriya jinan xurt dikin û dibêjin, Jin Jiyan Azadî. Li her derê ku em meşiyan, gel dibêje ‘em aştiyê dixwazin lê ji dewletê bawer nakin’. Me jî daxwaza wan anî Enqreyê. Divê dewlet jî ji bo aştiyê berpirsyariya xwe bi cîh bîne. Gelê me, malbatên me yên bi nirx û gelê Kurd, tevî hemû êşan dibêje aştî. Em ê jî wek TJAyê, dosyayeke ku daxwazên me di nav de cih digrin, pêşkeşî partiyên siyasî bikin. Werin vê carê em aştiyê pêkan bikin. Me di serî de serdana Girtîgeha Sîncanê kir. Ji bo aştiyê divê di serî de Rêberê Gelê Kurd Abdullah Ocalan û girtiyên siyasî werin berdan. Birêz Abdullah Ocalan dibêje ya girîng Azadiya gel e. Ew pir bi wateye. Tevî 26 sal in di girtîgehê de ye azadiya gel dixe pêşiya azadiya xwe. Em jî weke jinên Kurd dibêjin, azadiya birêz Abdullah Ocalan azadiya gelê Kurd e. Ji bo aştiyê jî divê aktorê sereke azad be. Heke dê aştî û biratî pêk were ev dê bi wekheviya gelan pêkan be. Bi berdana girtiyên siyasî pêkan be. Em li vir careke din dibêjin hevalên me yên di doza Kobanê de girtî ne, berdin.”
‘Qanûnên hewce derxînin’
Di berdewama axaftina xwe de Sebahat Tuncelê diyar kir ku êrişa Helebê êrişa li dijî gelê Kurd e û axaftina xwe wiha domand: “Gumanên gel hene û dibêjin, li pişt vê êrişê Tirkiye heye gelo? Ji ber ku Tirkiyeyê li wir her tim piştgirî da hezên cîhadîst. Em jî dibêjin, piştgiriya aştî û çareseriyê bikin. Li rex Şoreşa Rojava cih bigrin. Heke hûn êrişî Rojava bikin, birayên wan yên li vir nasekinin. Em ji bo gelê Filîstinê jî meşiyan. Em careke din dibêjin ku em li rex gelê Filîstînê ne. Divê Netanyahu demildest li ser xaka Filîstînê derbikeve û gelê Fîlîstînê azad bibe. Yên ku herî zêde gelê Filîstînê fêm dikin em in. Em ji bo aştiyê hatin Enqereyê. Divê ew fersend vê carê baş bê bikaranîn. Birêz Abdullah Ocalan di peyama ji me re şand de jî dibêj, ‘Ez muzakereya demokratîk’ diparêzim. Muzakereye demokratîk ne tenê pêkanîna gotina desthilatê ye, pêkanîna gotina hemû kesan e. Divê desthilat vê yekê pêk bîne. Komîsyon divê demildest biçe gravê û ji bo berdana çekan, qanûnên pêwîst derxîne.”
Piştî daxuyaniyê, girse ji bo tev li civîna koma DEM Partiyê bibe derbasî Meclisê bû.
