Amed – Rojnameger Serdar Altan bal kişand ser zimanê medyaya Tirk a êrişkar û got: “Armanca medyaya Tirk ew e ku pêvajo têk biçe. Beriya 1990î bi apolet bû piştî 2000î ket destê AKPê û dest guherî. Lê feraset nehat guhertin.”
Medyaya hawiz û desthilatdar bi salan e li şûna bibe dengê civak û heqîqetê, her tim dibe dengê desthilatê û propaganda desthilatê dike. Di salên 1990î de di bin fermana artêşê de weşan dikir, lê niha di bin desthilatiya AKPê de weşanê dike û heqîqet û rastiyan berovajî dike. Bêtir şer sor dike û xizmeta şer dike. Rojnameya Sozcu, Halk TV, NOW TV, SZC TV, Tele1, CNN TV û gelek rojname û televîzyonên din şer sor dikin û êriş dikin.
‘Tenê çapemeniya azad xwe li ser piyan girt’
Rojnameger Serdar Altan derheqê vî zimanê êrişkar yê medyaya Tirk de bertekên xwe nîşan da û got: “Li Tirkiyeyê zimanê medya û rojnamegeriya Tirk û yên bi giştî tên temaşekirin bi taybetî di meseleya Kurd de her tim bi pirsgirêk e. Di salên 1990î de dîsa bi heman şêwazî nêzîk dibûn. Hem rastî berovajî dikirin û hem jî ji meselê dûr disekinin. Ji bo dewlet ji wan re pirsgirêkan dernexe, wek perçeyekî dewletê xwe dihesibandin û wek dijminê Kurdan tevdigeriyan. Piştî salên 2000î, dema AKP hat ser desthilatê vê carê medyaya Tirk veguherî aliyê AKPê. Ew meydaya ku me berê jê re digot medyaya bi apolet wek beşekî artêşê, êdî bi serdema AKPê re bû aligirê AKPê. Dîsa dijminahiya Kurdan dikir, dîsa wek beşeke artêşê tevdigeriya. Lê beriya AKPê rewşa medya û rojnamegeriyê cuda bu, lê AKPê rojnamegerî kuşt. Rewşeke wisa avakir ku rojnamegerek ne dixwaze vî karî bike ne jî pirsgirêkên gel bîne rojevê. Tenê li hember vê yekê çapemeniya azad derket, xwe li ser piya girt. Di salên 90î de jî û di serdema AKPê de jî rojnamevanên Kurd ji bo rihê rojnamegeriyê têkoşîneke bêhempa dan meşandin.”
‘Mebest dijminahiya Kurdan e’
Serdar Altan diyar kir ku dema mirov îro lê dinêre, di pêvajoya Aştî û Civaka Demokratîk de tu guhertin di medyaya Tirk de çênebûye û got: “Medyaya nêzî AKPê di destpêkê de bi zimanekî êrişkar gel aciz dikir û êrişî nirxên gel dikir. Lê di van deman de hinekî zimanê xwe rast kiriye. Medyaya nêzî muxalefetê, yên ji xwe re dibêjin Kemalîst, nêzî CHPê, an jî yên nîjadperest bi zimanê xwe yê êrişkar derdikevin pêş. Rojnameya Sozcuyê serkêşiya vê yekê dike. Di vî warî de wek rojnameya Hurriyet a salên 1990î tevdigere. Dîsa mebest yek e. Dijminahiya Kurdan, tevgera azadiyê û her wiha dijberiya aştiyê ye. Di eslê xwe de tu guhertin di medyaya Tirk de çênebûye. Ev zimanê medyaya Tirk hêza ku aliyê gelê Kurd û kesên dixwazin aştiyê bînin xirab dike. Ev nêzîkatî, sekna wan û nuçeyên ku çêdikin zirarê dide pêvajoya Aştî û Civaka Demokratîk. Ne tenê gelê Kurd li Tirkiyeyê jî kesên dixwazin êdî xwîn nerije ji vî zimanê aciz dibin.”
‘Tişta ku ji bo feyda civakê be mirov jê re muxalefetê nake’
Rojnameger Serdar Altan bal kişand ser medyaya muxalefetê û dijberiya wê ya li hember pêvajoyê û axaftina xwe wiha bi dawî kir: “Helbet muxalefet û dijberiyek li hember hikumeta AKP û MHPê heye. Lê ji vê mixalefetê re pîvanek pêwîst e. Tişta ku feyda civakê be mirov jê re muxalefetê nake. Mirov dikare bêje di navbera Tevgera Azadiyê û hikumeta Tirk de hevditîn û mizakereyek dimeşe. Lê siyaseta Kurd hê jî mixalefeta xwe dimeşîne. Ne li ser esasê xirabkirina pêvajoyê, li ser esasê ku pêvajo baştir û xurtir bi rêve here dimeşîne. Armanca medyaya mixalefetê û medyaya Tirk pêvajo têk biçe û gelê Kurd zirarê bibîne. Her wiha êrişkariyek li ser tevgera azadiyê dikin. Ozgur Ozel û CHPê anîn ziman û gotin ku em dijberiya vê pêvajoyê nakin û divê zimanê medyaya wan jî ev yek be. Mirov dikare bibêje êdî kes ji wan bawer nake û li hember wan bertekek heye. Taybetî civaka Kurd li dijî vê rewşê bertek nîşan dide. Çapemeniya azad jî ji bo hewldan û nêzikatiyan wan vala derxîne çi ji destê wan were dike. Lê dibê xurtir em li ser bisekinin. Li hember vî zimanî, çapemeniya azad û civak divê helwestekê nîşan bide û vî zimanê tuj, tund têk bibe da ku ev ziman sernekeve.”
