Meşa KESKê ya bi dirûşma “Em ê karê xwe bi paş ve bistînin” di roja çaremîn de gihîşt Enqereyê. Meşvan xwestin pêşiya Wezareta Dadê duxayanî bidin lê ji aliyê polîsan ve hat astengkirin. Hevserokên KESKê diyar kirin ku mêşa wan her dem berdewam bike.
Konfederasyona Sendikaya Kedkarên Cemaweriyê (KESK) li dijî bêhiqûqiya KHKiyan bi dirûşma “Em ê karê xwe bi paş ve bistînin” di 13ê Cotmehê de ji Amedê ber bi Enqereyê ve dest bi meşê kiribû. Meş di roja çaremîn de gihîşt Enqereyê. Meşvan li Enqereyê ji aliyê endam û rêveberên sendîkayan û gelek kesan ve li pêşiya navenda giştî ya SESê hatin pêşwazîkirin. Piştî pêşwazîkirinê meşvan û girse xwestin bimeşin Wezareta Dadê û daxuyaniyê bidin. Meş ji aliyê polîsan ve hat astengkirin.
Polîsan meşvanan û girseyê pêşiya navenda giştî ya SESê dorpeç kir. Meşvan xwestin bimeşin û polîsan êrîşî wan kir. Dijî êrîşê girse dest bi çalakiya rûniştinê kirin. Di nav dorpeça polîsan de girse dirûşmeyan “Bijî berxwedana karkeran”, “Dê KHKê herin em ê bimînin” berz kirin û govend gerandin. Di nav dorpeçê de hevserokên giştî yên KESKê axivîn.
‘Em natirsin’
Hevserokên giştî yên KESKê diyar kirin ew çi bibe bila bibe meşa wan berdewam bike. Hevseroka Giştî Ayfer Kocak anî ziman ku ew bêhiqûqî hatin ixrackirin û got: “Ji bo na wê em ê herin pêşiya Wezareta Dadê daxwazên xwe li rûyê wan bibêjin. Em natirsin. Bi hezaran hevalên me ji kar hatin derxistin. Em bi wan re hatin li vir û em ê daxwazên xwe bînin ziman. Em îro 40 kes li vir in. Lê sibe em ê bibin hezaran û em ê holê rakin. Ev meş ji bo hiqûq were avakirin û aştiyê ye. Îro me li vir agir pêxist. Dê ev agir geş bibe û aştiyê bîne”
‘Darbe dewam dike’
Paşê parlamenterên DEM Partî û CHPê hatin serdana meşvanan. Li vir parlamenterê Îdirê Yilhan Hûn axivî û diyar kir ku kedkarên KESKê li ber xwe didin û got: “Berî 9 sala darbe pêk hat lê em îro dibînin ku darbe hêj jî berdewam dike.”
Meşvanan diyar kirin ku meşa van dê sibe pêşiya Meclisê berdewam bike.
