Şaredariya Dêrika Çiyayê Mazî bi piştgiriya Sanatça Organîzasyonê 3yemîn Mihrîcana Zeytûnan li dar xist. Mihrîcan bi konsera Koma Sorjiyanê û Xêro Abbas ve bi dawî bû.
Şaredariya Dêrika Çiyayê Mazî û Sanatça Organîzasyonê 3yemîn Mihrîcana Zeytûnan li dar xist. Roja ewil Parlamentera Mêrdînê Salîha Aydenîz, Hevşaredar, aktîvîstên Tevgera Jinên Azad (TJA), Rêxistinên DEM Partiyê yên navend û navçeyan, nûnerên saziyên sivîl û gelek welatî tev li bernameya mihrîcanê bûn. Serdana jinên karker kirin
Roja ewil girseya tev li mihrîcanê bû, serdana jinên karker ên di zeviyên zeytûnan de dixebitin kirin û piştre çûn serdana karkerên jin ên di fabrikaya zeytûnan de dixebitin. Pişt re, li Navenda Çandê ya Şaredariyê bi sernavê ‘Zayendîkirina Kedê û Xizanî’ panel li dar xistin. Di saetên êvarî de dengbêj Hediye Kalkan, Tîrêj, Şehmûs Temel û Dîren Temel derketin ser dikê û klam gotin.
Roja duyemîn Parlamenter, hevşaredar, nûnerên TJAyê, rêxistin û rêveberên partiyên siyasî yên navend û navçeyê û gelek welatî tev li bernameyê bûn. Beriya nîvro li baxçeyê şaredariyê danasîna zeytûnan û xwarinên herêmê kirin.
‘Bila yên li çiya siyasetê bikin’
Hevşaredarê Dêrika Çiyayê Mazî Cengîz Temellî beriya konsera ku li Qada Newrozê ya taxa Kaleyê hatiye lidarxistin axivî, bal kişand ser geşedanên siyasî yên di rojevê de û got: “Dixwazin Kurd li Rojava çekên xwe teslîmî DAIŞê bikin. Gelê Kurd li Rojava xweseriya xwe îlan kiriye û ji gelên Rojhilata Navîn re bûye hêvî. Divê hevalên me yên li vê qadê vê rol û ristê bigirin ser xwe. Gelê Kurd ji aştiyê re amade ye. Bila êdî hemû hevalên me bêne berdan. Bila yên li çiya werin li vê qadê siyasetê bikin.”
‘Gerîla ji bo pêşî vebe vekişiyan’
Parlamentera Mardînê Berîtan Guneş Altin jî anî ziman ku gelê Dêrikê ji rayedarên Tirkiyeyê re dibêje, “Ev bajar bajarê aştiyê ye, dê pêşengtiya aştiyê bike” û got: “Gerîlayan ji bo pêşî li aştiyê vekin ji Tirkiyeyê vekişîyan. Tirkiye bi salan e li Dêrikê, li Kurdistanê tenê pişaftin, asîmîlasyon, kuştin û şer daye pêşiya xwe. Lê dê ev dîrok vegere. Dem dema aştiyê ye.”
‘Çand nirxa gel e’
Hevşaredara Bajarê Mezin a Mêrdînê Devrîm Demîr jî anî ziman ku civak bi ziman û nasnameyan xwe hene û got: “Li ser çand û zimanê Kurdî polîtîkayên qirkirina çandî tên meşandin. Dema ziman û çanda gelekê tune be, ji wî gelî re gotina ‘geleke bi nirx’ nayê gotin. Bêgûman li hember van polîtîkayan qirkirina çandî, têkoşîneke bêhempa jî tê dayîn.”
Piştî axaftinan Koma Sorjiyan bi stranên şoreşgerî û bi tevger gel coşand. Welatî bi gotina stranan dirûşm berz kirin û govend gerandin. Li pey Koma Sorjiyan Hunermend Xêro Abbas derket ser dikê. Xêrok Abbas heya derengiya şevê bi stranên xwe ve kêliyên xweş li gel da jiyandin. Mihrîcan bi gerandina govendan û berzkirina dirûşman bi dawî bû.
