Sazî û dezgehên li Wanê ji bo bîranîna qurbaniyên Komkujiya Roboskiyê meşek li dar xistin û hat xwestin ku komkujî were ronîkirin.
Platforma Ked û Demokrasiyê ya Wanê bi boneya salvegera Komkujiya Roboskiyê li Kolana Hunerê ya Wanê daxuyanî da. Di daxuyaniyê de pankarta “Komkujiya Roboskiyê ji bîr neke û nede ji bîr kirin” hat vekirin û dirûşmên “Şehîd namirin” û “Wê desthilata AKPê hesap bide gel” hatin berzkirin. Nûnerên saziyan û pêkhateyên platformê tev li daxuyaniyê bûn.
‘Desthilatên despot mehkûmî têkçûnê ye’
Li ser navê platformê Serokê Odeya Endezyarên Zîraatê Engîn Işik metna daxuyaniyê xwend û got: “Di salên derbasbûyî de gelek caran hatiye îspatkirin ku siyasetên çewisandin û tundiyê yên ku êşên nayên vegotin li welatê me diafirînin, nikarin ti pirsgirêkên bingehîn ên welatê me çareser bikin. Li gel vê jî israra di polîtîkayên bêçareseriyê de nîşan dide ku AKP tenê li parastina desthilatdariya xwe difikire, ne çareserkirina pirsgirêkên welat. Lê dîrok şahid e ku yên ji bo desthilatdariya xwe bidomînin zext û zorê li gel dikin, zû yan dereng mehkûmî têkçûnê ne.”
Ji bo Roboskî û Rojava derketin qadan
Tevgera Jinên Azad (TJA), Partiya Herêmên Demokratîk (DBP) û Partiya Wekhevî û Demokrasiyê ya Gelan (DEM Partî) jî li Qada Kent ya Wanê têkildarî salvegera Komkujiya Roboskî û êrişên li ser Bakur û Rojhilatê Sûriyê daxuyaniyek dan. Pêşiya daxuyaniyê parlementerên DEM Partiyê Mahmût Dîndar û Mehmet Kamaç û girseya bi wan re heta cihê daxuyaniyê meşiyan. Parlementeran ji bo ronîkirina Komkujiya Roboskiyê bang kirin û welatî vexwendin daxuyaniyê. Di daxuyaniyê de pankarta “Rojava em in, em ji bo Rojava dimeşin” hat vekirin û dirûşmên “bijî berxwedana Rojava” û “bijî berxwedana Îmraliyê” hatin berzkirin. Hevşaredarê Bajarê Mezin ê Wanê Abdullah Zeydan, Parlementer Mahmût Dîndar û Mehmet Kamaç, hevserokên DBP û DEM Partiyê, nûnerên saziyên sivîl, Meclîsa Dayikên Aştiyê, aktivîstên TJAyê, Meclîsa Ciwanan û gelek welatî tev li daxuyaniyê bûn.
‘Ji bo Roboskî dubare nebe, divê Rojava bê parastin’
Pêşiya ku metna daxuyaniyê bê xwendin, parlementeran çîroka çend zarokên ku di Komkujiya Roboskiyê de hatine qetilkirin, xwendin û navên 34 kesên hatin qetilkirin, qîr kirin. Piştre rêveberê DBPê Emîn Kûtaz metna daxuyaniyê xwend û diyar kir ku erdnîgariya Kurdistanê ji berê heta niha her tim bûye erdnîgariya êşên bêdawî, komkujî û kuştinên kiryar nediyar. Emîn Kûtaz da zanîn ku ev rastî îro li axa Rojava diqewime û wiha dawî kir: “Îro jî bi vê ferasetê hewl dide daxwazên gelên Rojava yên ‘aştî û azadiyê’ bi komkujiyan dike hedef. Di vê çarçoveyê de ji bo êrîşên Roboskî dubare nebin parastina Rojava erkeke civakî ye.”
‘Bêtehemuliya li hemberî Roboskî didome’
Emîn Kûtaz anî ziman ku desthilat bi polîtîkayên ewlekariyê nikare pirsgirêka Kurd çareser bike. Emîn Kûtaz, destnîşan kir ku divê desthilat dest ji vê nêzîkatiyê berde û wiha got: “Lê belê em dibînin ku tevî 13 sal derbas bûne jî bêtehamuliya hêzên siyasî ya li hemberî Roboskî didome. Girtina Roboskî-Der û hilweşandina Bîrdariya Roboskiyê ya ji aliyê qeyûmên dagirker ve ev bêtehamulî bi awayekî herî berbiçav derdikeve holê. Divê neyê ji bîr kirin ku bingeha vê bêtehamuliya li ser dijminatiya li Kurdan, daxwaziya têkbirina bîra civakê ye. Ne pêkan e ku kiryarên dijmirovahî bên paşguhkirin, jibîrkirin an veşartin. Di ser Komkujiya Roboskî re çi qas dem derbas bibe jî, heta ku berpirsyarên vê qetlîamê neyên darizandin û cezakirin, aştiyeke civakî ya mayînde û biedalet pêk nayê. Di vî warî de em careke din destnîşan dikin ku divê rastiya Komkujiya Roboskî ya ku di bîra me de şopeke kûr hişt, bê eşkerekirin û hesab ji berpirsiyaran bê pirsîn.”
Herî dawî parlementerê DEM Partiyê Mahmût Dîndar jî axivî û banga çareseriya Meseleya Kurd kir. Mahmût Dîndar, bi bîr xist ku Roboskî û hemû komkujiyên li Kurdistanê qewimîn encama Meseleya Kurd e û got ku muxatabê çareserî jî Rêberê PKKê Abdullah Ocalan e.
Daxuyanî bi dirûşmeyan bi dawî bû.
