Xwendekarên Zanîngeha Dîcleyê ji bo salvegera 10emîn a kuştin Tahîr Elçî bernameya bîranînê li dar xist. Xwendekaran got: “Em ê li ser rêya Tahir Elçî têkoşîna xwe ya parastina mafên mirovan bidomînin.”
Xwendekarên Zanîngeha Dîcleyê li ber avahiya Beşa Hiqûqê bi minasebeta salvegera 10emîn a kuştina Serokê Baroya Amedê Tahir Elçî bernameya bîranînê li dar xist. Di daxuyaniyê de pankarta “Tahir Elçî Ne Tenê Navek e, Rûmeta Berxwedana Gel e” hat vekirin û her wiha dowîzên, “Em tev Tahir Elçî ne”, “Siyaseta şer jiyanê teng dike” û “Ji bo doza Elçî têkoşîn” hatin hildan. Gelek xwendekar, endamên Rêveberiya Baroya Amedê, endamên Komeleya Hiqûqnasên ji bo Azadiyê (OHD) a Şaxa Amedê û endamên Komeleya Mafên Mirovan (ÎHD) a Şaxa Amedê beşdarî daxuyaniyê bûn. Daxuyaniya bi Kurmancî xwendekara beşa hiqûqê Medya Aslan xwend, daxuyaniya bi Tirkî jî xwendekarê beşa hiqûqê Nazîf Ok xwend.
‘Em ê tekoşîna xwe berdewam bikin’
Rêveberê Baroya Amedê Bawer Mizrakli beriya daxuyaniyê axivî û bal kişand ser salvegera kuştina Tahir Elçî û got: “10 sal in faîlên Tahir Elçî nehatin darizandin. Faîl bi awayek formalîte hatin darizandin. Piştre jî hatin beraetkirin. Em dest ji têkoşîna xwe ya azadiya mafan bernadin, em ê tekoşîna xwe berdewam bikin heta ku faîlên Tahir Elçî werin cezakirin.”
‘Em ê her tim li ser rêya Tahir Elçî bin’
Medya Aslan daxuyanî xwend û anî ziman ku ew Tahir Elçî di salvegera 10emîn a kuştina wî de bi rêzdarî bi bîr tînin û wiha got: “Birêz Elçî, berî her tiştî parêzvanê mafên mirovan bû. Wî ji bo aştiya herêmî û gerdûnî xebat meşandin. Li erdnigariya me li dijî talankirina bajar û dîrokê têkoşiya û ji bo ronîkirina bûyerên ‘faîl nediyar’ di nava xebateke domdar de bû. Di vê rêyê de canê xwe feda kir. Piştî ku derket bernameyeke televîzyonê Tahir Elçî bi awayekî sîstematîk bi lînçkirinê re rû bi rû mabû. Piştre pêvajoya binçavkirina wî dest pê kir. Paşê hat berdan. Dema ku wî li ber Minareya Çarling a ku hatibû texrîbkirin daxuyaniya çapemeniyê dida, li ber çavan bû hedefa guleyan û hat kuştin.”
‘Cihê bûyerê nehat kontrolkirin’
Medya Aslan diyar kir ku li ser kuştina Tahir Elçî bi awayekî zelal lêkolîn nehatine kirin û li cihê bûyerê bi awayekî hûrgilî lêkolîn nehatin kirin û wiha got: “Li cihê bûyerê lêkolînên ku hatin kirin jî bi awayekî kêm bûn. 10 sal bi ser qetilkirina wî re derbas bûn, hê jî faîlê wî nehatine cezakirin. Di dozê de polîtîkaya bêcezatiyê hat meşandin. Xwestin ku ser bûyerê bigirin. Guhdarîkirina li serokwezîrê wê demê Ahmet Davutoglu hat redkirin, ev jî nîşan dide ku doz ji ber sedemên siyasî her tim dihat paşxistin û di encamê de jî doz bi lezgînî qedandin.”
‘Bi xatirê te qasidê aştiyê’
Medya Aslan bal kişand ne eşkerekirina faîlê Tahîr Elçî û got: “Tahir Elçî, ji ber ku li dijî şer aştî diparast, dixwest êrişên li ser dîroka bajêr bi dawî bibin, dixwest bûyerên ‘faîl nediyar’ bên ronîkirin, bi awayekî hovane hate kuştin. Em îro li vir careke din dibêjin; em ê li ser rêya ku serokê nemir Tahir canê xwe feda kir, bimeşin û têbikoşin. Heta ku kujer werin cezakirin, em ê têbikoşin.
Bi xatirê te qasidê aştiyê…”
