Li navenda Amedê û navçeya Bismilê bi pêşengiya MEBYA-DERê re bi girseyî serdana şîna 10 endamên PKKê yên di dem û cihên cuda de jiyana xwe ji dest dane, hate kirin.
Bi pêşengiya Komeleya Piştevanî û Alîkariyê ya bi Malbatên Xizmên Xwe Winda Kirine re (MEBYA-DER) serdana şîna endamên PKKê yên ku di dem û cihên cuda de jiyana xwe dest dane hate kirin.
Rêveberên MEBYA-DERê, rêveberên DEM Partiyê û DBPê yên bajêr û navçeyan, Dayikên Aştiyê, aktîvîstên TJAyê, nûner û endamên rêxistinên sivîl, endamên Meclîsa Ciwanan ên DEM Partiyê û DBPê, hevşaredarên DEM Partiyê yên navçeyan û gelek kes beşdarî serdanên şînê bûn.
Girseyê ewilî serdana şîna endamên PKKê Seyfettîn (Îhsan Balkan) ê ku di sala 1995an de jiyana xwe ji dest daye û endamê PKKê Farqîn (Îbrahîm Halîl Noyam) ku di sala 1994an de jiyana xwe ji dest daye û navê wan nû hatine ragihandin, kir. Şîn li Mala Şînê ya Şaklatê ya li taxa Huzurevleriyê navçeya Peyasê hatiye danîn. Girseyê sersaxiyê ji malbatan re xwest û fatîhe hat xwendin. Her wiha ji bo cangoriyên têkoşîna azadiyê rêz hate girtin.
Serdana şîna 8 gerîlayan
Piştre girseyê berê xwe da navçeya Bismilê û serdana şîna 8 endamên PKKê ku di dem û cihên cuda de jiyana xwe ji dest dane, kir. Şîn li Mala Şînê ya li taxa Firatê ya Bimsilê hatiye danîn. Girseyê sersaxî ji malbatan re xwest. Di şînê de dua û fatîhe hatin xwendin. Piştre jî ji bo cangoriyên di têkoşîna azadiyê de jiyana xwe ji dest dane rêz hate girtin û dirûşmeya “Şehîd namirin” hate berzkirin. Li ser maseyê wêneyê her 8 gerîlayan hat danîn.
‘Em bi wan serbilind in’
Hevseroka MEBYA-DERê Gurbet Sevîktek Ari di şînê de axivî û wiha got: “Em îro minnetdarê hevalên xwe şehîd in. Em mecbûr in têkoşîna wan bidomînin. Em ê xewn û xeyalên hevalên xwe yên şehîd bi cih bînin. Wekî ku tê zanîn îro pêvajoya ‘Aştî û Civaka Demokratîk’ a ku bi pêşengiya rêberê gelan birêz Abdullah Ocalan hatiye destpêkirin, em bi vê pêvajoyê şanaz in. Heta ji destê me bê em ê doza şehîdên xwe li erdê nehêlin. Heta ku dilopek xwîn di laşê me de hebe, em ê giradayî doza wan bimînin û li pey serokatiya xwe bin. Em hêvî dikin ku êdî xwînrijandin li vî welatî bi dawî bibe. Em bi şehîdên serbilind in.”
Navên 8 endamên PKKê ku ku hatibû ragihandin û şîna wan li Bismilê hate danîn wiha ye:
* Dilbirîn (Sebahattîn Korkak) di sala 1995an de li herêma “Şehîd Kendal” jiyana xwe ji dest daye.
* Şoreş (Habib Kiliç) di sala 1995an de li Çiyayê Cûdî jiyana xwe ji dest daye,
* Şervan (Hamît Ceylan) di sala 1991an de li Heftanînê jiyana xwe ji dest daye.
* Tîrêj (Îsmaîl Fîlîz) di sala 2000î de li Qendîl Zele jiyana xwe ji dest daye.
* Brûsk (Mehmet Emîn Caynak) di sala 1997an de li Dêrsimê jiyana xwe ji dest daye.
* Dogan (Suphan Yazbaşi) di sala 1995an de li navçeya Çinara Amedê jiyana xwe ji dest daye.
* Mazlûm (Mehmet Han Azarak)
* Mazlûm (Hayretîn Çelîk)
