Dayika bi navê Mûhlîse Karaguzel a ku ji sala 2019an vir ve girtiye serbest hat bardan.
Mûhlîse Karaguzel (65) a di sala 2019an de Hevserokatiya Partiya Demokratîk a Gelan (HDP) a Amedê kiribû ji wê demê heta niha girtî bû. Tevî ku gelek nexweşiyên wê yên weke şekir, krîza dil, tansiyon û bêhnçikandinê lê peyda bûbûn jî bi salan di girtîgehê de hat ragirtin. Mûhlîse Karaguzel li girtîgehên Mûş, Kayserî, Îzmîr û herî dawî jî li Amedê dihat girtin. Di heman demê de di zindana Kayseriyê de emeliyata dil bûbû û dîsa jî tevî van nexweşiyan wê biribûn girtîgehê.
Rêveberên Komeleya Hevgirtinê ya bi Malbatên Girtî û Hikûmxwaran re (TUAY-DER), Hevseroka Partiya Wekhevî û Demokratîk a Gelan (DEM Partî) a Amedê Gulşen Ozer û endamên meclisa şaredariyê yên Peyasê ya Amedê û gelek nûnerên saziyên sivîl Mûhlîse Karaguzel pêşwazî kirin. Di dema pêşwaziyê de girseya ku li wir amade bû dirûşmeya “Jin Jiyan Azadî” û “Bijî berxwedana zindanan” berz kirin.
‘Dilê min li ba wan e’
Mûhlîse Karaguzel li ber girtîgehê axivî û got: “Min dixwest em hemû bi hev re derbikevin. Ez derketim lê dilê min li ba wan e. Min zarokên xwe li hundir hişt lê dilê min li ba wan e. Înşaallah di demên pêş de em hemû bi hev re azad bibin. Armanca me ew e.”
